काठमाडौं, ३१ भदौ । ‘जेन-जी’ आन्दोलनमा ज्यान गुमाएकाहरूलाई राष्ट्रिय सम्मानसहित अन्त्येष्टि गरिएको छ। शवयात्रामा ऊर्जामन्त्री कुलमान घिसिङ र गृह तथा कानुनमन्त्री ओमप्रकाश अर्याल पनि सहभागी भए। घिसिङले राष्ट्रिय झण्डा बोके भने अर्यालले झण्डा ओढेर शहीदप्रति सम्मान व्यक्त गरे।

शवयात्रा त्रिवि शिक्षण अस्पतालबाट सुरु भई चक्रपथ हुँदै पशुपति आर्यघाट पुगेको थियो। मृतकका परिवार, आफन्त र सर्वसाधारणले शहीदका तस्बिर र राष्ट्रिय झण्डा बोकेर सहभागिता जनाए। कतिपयले ‘निस्सन्तानलाई के थाहा जेनजीको सपना ?’ लेखिएको कपडा लगाएर विरोध गरे।

सरकारले मृतकलाई शहीद घोषणा गरी राष्ट्रिय सम्मानसहित अन्त्येष्टि गर्ने र असोज १ गते राष्ट्रिय शोक बिदा दिने निर्णय गरेपछि परिवारहरू अन्त्येष्टिका लागि सहमत भए।

भ्रष्टाचार र सामाजिक सञ्जालमाथिको प्रतिबन्धविरुद्धको प्रदर्शनमा हिंसा हुँदा ७२ जनाको ज्यान गएको थियो। अधिकांशको गोली लागेर मृत्यु भएको थियो भने केहीका शव जलेको अवस्थामा फेला परेका थिए। त्रिवि शिक्षण अस्पतालका अनुसार गोली लागेकाहरूको छाती र टाउकोमा चोट देखिएको छ।