यातायात व्यवस्था कार्यालय कास्कीका तत्कालीन निमित्त कार्यालय प्रमुख गोकुल शर्मा पौडेल हाल भूमि व्यवस्था, कृषि तथा सहकारी मन्त्रालय, कास्की गण्डकी प्रदेश पोखरामा शाखा अधिकृतमा कार्यरत छन् ।

पोखरा, ४ चैत । सवारी चालक अनुमति पत्रका लागि लिईएको परीक्षामा अनुत्तिर्ण भएका व्यक्तिलाई पनि लाइसेन्स दिएको आरोपमा यातायात व्यवस्था कार्यालय कास्कीका तत्कालीन निमित्त कार्यालय प्रमुख गोकुल शर्मा पौडेलसहित ९ जना विरुद्ध विशेष अदालतमा मुद्दा दायर भएको छ ।

१६८ जना परीक्षार्थीहरुको प्रयोगात्मक परीक्षाको परिणाम फेरबदल गर्दै गरी घुस लिएर लाइसेन्स दिएको आरोपमा नौंजना विरुद्ध अख्तियार दुरुपयोग अनुसन्धान आयोगले छानबिन गरेको थियो । कार्यालयका प्रमुख गोकुल शर्मा पौडेलले पोखराबाट २०७४ मंसिर, २०७६ कात्तिक र मंसिरमा सञ्चालन गरेको लाइसेन्स परीक्षामा फेल भएका व्यक्तिलाई पास बनाइदिएको भन्ने उजुरी अख्तियारमा परेको थियो ।

अख्तियारले शाखा अधिकृत हरिप्रसाद गौतम, अधिकृत भरतराज काफ्ले, प्रेमप्रसाद श्रेष्ठ, डिल्लीराम बराल, होमनाथ शर्मा, कम्प्युटर अपरेटर झलक पौडेल, मोहनमणि सुवेदी र भरतमणि बरालविरुद्ध पनि मुद्दा दायर गरेको छ । उनीहरुले विभिन्न वर्गका सवारी चालक अनुमतिपत्रको प्रयोगात्मक परीक्षामा अनुत्तिर्ण र अनुपस्थित परीक्षार्थीलाई पनि उत्तिर्ण गर्ने र उत्तिर्ण भएका परीक्षार्थीलाई अनुत्तिर्ण गरी प्रयोगात्मक परीक्षाको परिणाम फेरबदल गर्न शर्मालाई सघाएको अख्तियारको आरोप छ ।

त्यसमा अनुसन्धान हुँदा पौडेल लगायतले विभिन्न वर्गका सवारी चालक अनुमतिपत्रको प्रयोगात्मक परीक्षामा फेल तथा अनुपस्थित परीक्षार्थीहरूलाई पास र पास भएकालाई फेल गरी प्रयोगात्मक परीक्षाको परिणाम पनि फेरबदल गरेको अख्तियारले जनाएको छ। पौडेल हाल भूमि व्यवस्था, कृषि तथा सहकारी मन्त्रालय, कास्की गण्डकी प्रदेश पोखरामा शाखा अधिकृतमा कार्यरत छन् ।

अख्तियारले उनीसँगै तत्कालीन शाखा अधिकृत हरिप्रसाद गौतम, अधिकृतस्तर आठौं भरतराज काफ्ले, अधिकृतस्तर सातौं प्रेमप्रसाद श्रेष्ठ, अधिकृतस्तर छैठौं डिल्लीराम बराल, कम्प्युटर अधिकृत छैठौं होमनाथ शर्मा, कम्प्युटर अपरेटर (करार) झलक पौडेल, कम्प्युटर अपरेटर (करार) मोहनमणि सुवेदी र अधिकृतस्तर आठौं भरतमणि बरालविरूद्ध मुद्दा दायर गरेको हो।

उनीहरूले १६६ जना परीक्षार्थीहरूको इलेक्ट्रोनिक लाइसेन्स भेहिकल रेजिस्टर सिस्टममा रिजल्ट अपडेट तथा रिजल्ट अप्रुभ गर्ने क्रममा पास गराइदिएको प्रवक्ता भण्डारीले बताए। यस्तै दुई जनाको प्रयोगात्मक परीक्षामा पास भएकाहरूलाई रिजल्ट अपडेट गर्दा फेल गराई जम्मा १६८ जनाको परीक्षा परिणाम फेलबदल गरेको देखिएको अख्तियारले जनाएको छ।

साथै, परिणाम फेरबदल गर्ने कर्मचारीहरूलाई पनि कुनै प्रकारको विभागीय कारबाही नगरेको भन्दै उनीहरूविरूद्ध मुद्दा दायर गरेको हो । भ्रष्टाचार निवारण ऐन, २०५९ को दफा १३ बमोजिमको कसुर भएको भन्दै अख्तियारले अधिकतम सजाय दिन माग गरेको छ।