मोरङ, ४ फागुन । नेपाली कांग्रेसका नेता डा शेखर कोइरालाले भ्रष्टाचार नियन्त्रणका लागि सबै गम्भीर बन्नुपर्ने बताउनुभयो ।

मोरङको बूढीगङ्गा गाउँपालिकाले सञ्चालनमा ल्याएको पालिकास्तरीय अस्पतालको आज उद्घाटन गर्दै उहाँले भ्रष्टाचारसँग सम्बन्धित विभिन्न अन्तरराष्ट्रिय तथ्याङ्कले देशलाई अफ्ठ्यारो स्थितिमा पारेकामा चिन्ता व्यक्त गर्नुभयो । यी तथ्याङ्क सार्वजनिक गर्ने निकायले औँल्याएका समस्या र सुधारका आवश्यकतालाई सम्बोन गरिनुपर्ने बताउनुभयो ।

प्रतिनिधिसभा सदस्य डा कोइरालाले देशको आर्थिक अवस्था सुधार, सुदृढीकरण, औद्योगिक विकास र कृषि उत्पादकत्व वृद्धि गर्न सरकारले महत्वपूर्ण भूमिका निर्वाह गर्नुपर्ने सुझाव दिनुभयो ।

यसैगरी उहाँले विद्यालयस्तरदेखि नै स्वास्थ्य सचेतना फैलाउन आवश्यक रहेको चर्चा गर्दै मानिस शारीरिक र मानसिक रुपमा स्वस्थ भएमा मात्रै देश सुन्दर र विकसित हुने धारणा राख्नुभयो ।

मनमोहन प्राविधिक विश्वविद्यालयका उपकुलपति डा सुवासश्री पोखरेलले हरेक वर्ष विश्वविद्यालयले पाँच सय रोजगारी सिर्जना गर्नेगरी काम गरिरहेको जानकारी दिँदै पालिकासँगको सहकार्यमा रोजगारमूलक तालिम र शिक्षा दिने कामम भइरहेको जानकारी दिनुभयो ।

बूढीगङ्गा गाउँपालिका अध्यक्ष जितनारायण थापामगरले पालिकाले भौतिक पूर्वाधारको विकाससँगै शिक्षा र स्वास्थ्यलाई उच्च प्राथमिकतामा राखेर काम गरिरहेको बताउनुभयो । अस्पतालको फार्मेसीबाट बिमामार्फत उपलब्ध हुने पाँच सय र गाउँपालिकाले छुट्टै ९८ प्रकारका औषधि निःशुल्क वितरण गर्दै आएको जानकारी उहाँले दिनुभयो ।

दश शय्याको पालिकास्तरीय अस्पतालमा आकस्मिक र बहिरङ्ग सेवा, फिजिसियन, दाँत, प्रसूति, एक्से–रे, ल्याब, फार्मेसीलगायत सेवाहरू उपलब्ध रहेका त्यस अवसरमा जानकारी दिइयो ।