पोखरा, ८ कार्तिक । सहकारी ठगी र संगठित अपराधमा अनुसन्धानका लागि राष्ट्रिय स्वतन्त्र पार्टीका सभापति एवं पूर्वउपप्रधान तथा पूर्वगृहमन्त्री रवि लामिछाने र पूर्वडीआईजी छविलाल जोशीलाई थप ७ दिन हिरासतमा राखेर अनुसन्धान गर्न जिल्ला अदालत कास्कीले आज बिहीबार अनुमति दिएको छ ।

बिहीबार आज न्यायाधीश चन्द्रकान्त पौडेलको इजलासले सूर्यदर्शन सहकारी ठगीमा संलग्न पूर्वगृहमन्त्री लामिछाने, पूर्वडिआईजी जोशी र लिला पछाईलाई आजैदेखि लागु हुने गरी थप ७ दिन हिरासतमा राखेर अनुसन्धान गर्न अनुमति दिएको हो ।

जिल्ला सरकारी वकिल कार्यालयकी न्यायाधिवक्ता कमला काफ्ले, सहायक जिल्ला न्यायाधिवक्ताद्वय शान्तिदेवी शर्मा र विपिनराज तिवारी तथा कानुन व्यवसायीहरु युवराज पराजुली र विवि विष्टले बहस गर्दै उनीहरुलाई थप २५ दिन हिरासतमा राखेर अनुसन्धान गर्नुपर्ने माग दावी गरेका थिए ।

लामिछानेका तर्फबाट वरिष्ठ अधिवक्ताहरु नारायण घिमिरे, हरिप्रसाद सुवेदी तथा अधिवक्ताहरु नारायण कँडेल, सांसदसमेत रहेकी सविता गौतम, पदमराज शर्मा र मधुकुमार चौलागाँईले बहस गरेका थिए । इजलास समक्ष आक्रोशित देखिएका लामिछानेका तर्फबाट सांसद सोविता गौतमले पनि बहस गरेकी थिईन् । त्यस्तै, जोशीका पक्षमा वरिष्ठ अधिवक्ता जगन्नाथ ढकालले बहस गरेका थिए ।

बहसका क्रममा इजलाससमक्ष आफ्नो भनाई राख्दै लामिछाने आक्रोशित रुपमा प्रस्तुत भएका थिए । उनले आफूले पटक–पटक परीषा दिइसकेको तर आफूमाथि राजनीतिक प्रतिसोध साँधिएको दावी गरेका थिए । तर केही बेरमा सम्हालिएका लामिछानेले न्यायालयप्र ितभने आफूलाई विश्वास रहेको बताए ।

पूर्वगृहमन्त्री लामिछानेलाई प्रहरीले कार्तिक २ गते शुक्रबार पक्राउ गरेको थियो । सोही रात नै पोखरा ल्याईएका लामिछानेलाई शनिवार सार्वजनिक विदा परेकाले आइतबार मात्र अदालतमा उपस्थित गराएको थियो । उनलाई जिल्ला अदालत कास्कीले शुक्रबारबाटै गणना हुने गरी ६ दिन म्याद दिएको थियो ।

सोही प्रकरणमा पक्राउ परेका पूर्वडीआईजी छविलाल जोशीलाई भने असोज ६ गते प्रहरीले पक्राउ गरेर हिरासतमा राखेको थियो । रवि पक्राउ परेका दिन शुक्रबार पूर्वडीआईजी जोशीलाई गत असोज १७ गतेबाट लागू हुने गरी २० दिनको म्याद थप गरिएको थियो ।

जिल्ला प्रहरी कार्यालय कास्कीमा सूर्यदर्शन सहकारीको रकम गोर्खा मिडिया मार्फत् अपचलन गरेको भन्दैं गोर्खा मिडिया प्रालिका पूर्वप्रबन्ध निर्देशक रवि लामिछाने, सञ्चालक छविलाल जोशीसहित १८ जना व्यक्ति र संस्था विरुद्ध किटानी जाहेरी परेको थियो । यहीं प्रकरणका मुख्य अभियुक्त गोर्खा मिडिया प्रालिका तत्कालिन अध्यक्ष जीवी राई भने हालसम्म पनि फरार छन् ।

सूर्यदर्शन सहकारीबाट गोर्खा मिडियामा ५ करोड ५८ लाख ९ हजार रुपैयाँ नियम विपरित लगेको देखिन्छ । जीवी राई नेतृत्वको देशभरका सहकारीबाट गोर्खा मिडियामा मात्र झण्डै ६५ करोड रुपैयाँ लगिएको थियो । त्यसो त, अनुसन्धानका क्रममा सूर्यदर्शन सहकारीबाट रविले १ करोड रुपैयाँ लिएर गोर्खा मिडियाको नाममा ऋण मिलान गरेको वित्तीय प्रतिवेदनमा समेत उल्लेख छ । सहकारी ठगी प्रकरणमा रविसहित माओवादी केन्द्रका विद्यार्थी नेता दिपेश पुनसहित व्यक्ति र संस्था गरी १८ जनाविरुद्ध पीडितले पूरक जाहेरी दिएका थिए ।

पूर्वअध्यक्ष ज्ञानबहादुर बम्जन, नेचर हब प्रालि, गोर्खा मिडिया प्रालि, वारिसान इन्फर्मेसन टेक्नोलोजी, स्प्रिङ उड रियल स्टेट, गोर्खा ग्रुप इन्भेस्टेन्ट, गोर्खा आयुर्वेद प्रालि लगायतलाई विपक्षी बनाएर उनीहरुले पूरक जाहेरी दिएका थिए ।

त्यसअघिकै जाहेरीका आधारमा सूर्यदर्शन सहकारीबाट करिब डेढ अर्ब रकम हिनामिना गरेको आरोपमा प्रहरीले गत साल भदौ २४ गते १९ जनाविरुद्ध पक्राउ पूर्जी जारी गरेको थियो । पटकपटक गरेर सूर्यदर्शन सहकारी प्रकरणमा ४४ जनालाई पक्राउ पुर्जी जारी गरिएकोमा शुक्रबार मात्र रवि सहित १४ जना विरुद्ध थप पक्राउ पुर्जी जारी भएको छ ।

उपाध्यक्ष कैलाशकुमार दर्लामी, कोषाध्यक्ष कुमार रम्तेल, पूर्व सञ्चालक महेन्द्र भोटे भनिने शिवबहादुर गुरुङ, भविश्वर आचार्य, पूर्व सञ्चालक समिति सदस्य प्रमोद भट्टराई पनि पुर्पक्षका लागि थुनामै छन् ।