पोखरा, १५ भदौं । पोखरा–१४ मझेरीपाटनस्थित गोर्खा भिलेजमा रहेको सिभिल हाईड्रोपावर स्टोर्सको कम्पाउण्डमा स्टोर गरी राखेको ३३ के.भी. ट्रान्समिसन लाईनमा प्रयोग हुने अन्डरग्राउण्ड पावर केवलको लागि आवश्यक पर्ने तामाको तार, आल्मोनियम अन्डरग्राउण्ड पावर केवल र जेनेरेटरको पार्टपुर्जा समेत गरी ६ लाख रुपैयाँ बराबरको सामान भदौं १२ गते राती चोरी गर्नेहरुलाई प्रहरीले पक्राउ गरेको छ ।

वडा प्रहरी कार्यालय रामबजार कास्कीबाट खटिएको प्रहरी टोलीले खोजतलास तथा अनुसन्धान गर्दै पोखरा–१४, चाउथेस्थित तारको बाहिरी कबर फाली तामाको तार मात्र बोरामा राख्न लागेको अवस्थामा ९६ केजी तामाको तार, ७ केजी तामाको टुक्राहरुसहित ३ जनालाई पक्राउ गर्न सफल भएको थियो ।

प्रहरीले पोखरा–१४ मझेरीपाटन बस्ने २९ वर्षीय सुजन परियार, सोही वडाको आमी प्लटिङ बस्ने ३७ वर्षीय विकास खवास र पोखरा–१५, खाल्टेमसिना बस्ने २६ वर्षीय निशान दर्जीलाई पक्राउ गरेको हो । पक्राउ परेकाहरुलाई चोरी तथा डाँका सम्बन्धि मुद्दामा जिल्ला अदालत कास्कीबाट ५ दिनको म्याद थप गरी अनुसन्धान प्रकृया अगाडि बढाईएको जिल्ला प्रहरी कार्यालय कास्कीका प्रमुख एसपी मोहनकुमार थापाले जानकारी दिए ।