पोखरा, २८ जेठ । जिल्ला अदालत कास्कीले सहकारी पीडित बचतकर्ताहरुलाई कार्यालय प्रवेशमा नैं अघोषित रुपमा रोक लगाएको छ । हिजो सोमबार विहान १० बजे अदालतको गेटमा पुगेका सहकारी पीडित बचतकर्ताहरुलाई त्यहाँ तैनाथ सुरक्षाकर्मीले भित्र प्रवेश गर्न नदिई रोकेका थिए ।

सहकारी पीडित बचतकर्ताहरुलाई अदालतको गेटमा सुरक्षाकर्मीहरुले रोकेपनि सहकारी ठगीका आरोपितका आफन्त र नातेदारहरु भने सजिलैं ईजलासभरी थुप्रिएर बसेका देखिन्थे । यस सम्बन्धमा पीडित बचतकर्ताहरुले सुरक्षा निकायका प्रमुख र अदालतका कर्मचारीहरुलाई गुहार्दा पनि उनीहरुलाई विभिन्न वाहना बनाउँदैं अन्त्यमा सुरक्षाको कारण देखाउँदैं रोकिएको थियो ।

सोमबार मित्र मिलन सहकारी र प्राइम सहकारी लगायतका पीडित बचतकर्ताहरुलाई प्रहरीले अदालतको गेटबाट नै रोकेको थियो । आइतबार मात्र जिल्ला सरकारी वकिलको कार्यालयले गण्डकी प्रदेश कैं सबैभन्दा ठुलो बचत रकम ठगी भएको प्राइम सहकारीको मुद्दा दर्ता गर्दै सोमबार बयानका लागि ८ जनालाई अदालतमा उपस्थित गराएको थियो । भने, उता मित्र मिलन सहकारीका पूर्व अध्यक्ष भरत भट्टराईसहित दुईजनालाई बयानका लागि प्रहरीले अदालतमा उपस्थित गराएको थियो ।

मित्र मिलन सहकारी बचत पीडित संघर्ष समितिका संयोजक सूर्य पोखरेलले हजारौं पीडित बचतकर्ताहरुको तर्फबाट आएका हामी १५/२० जनालाई पनि अदालत प्रवेशमा रोक लगाईनु, न्यायाधीशले नै ईजलास भित्र थर्काउनु र सेटिङ मिलाएर ठगी आरोपितहरुलाई न्यून धरौंटीमा सहजै उन्मुक्ति दिईनु लगायतका घटनाक्रमहरुले आफूहरुलाई अदालतबाट न्याय पाउँछौं भन्नेमा शंका उत्पन्न भएको बताए ।

संयोजक पोखरेलले भने–‘हामीलाई मुख्य गेटमा नै सुरक्षाकर्मीहरुले रोकेर भित्र जान मिल्दैंन भन्दैं हप्कीदप्की लगाउनुको कारण के हो ? हामी पीडितहरुले दिएको जाहेरीका आधारमा पक्राउ परेकाहरुलाई अदालतमा उपस्थित गराउँदा हामीलाई बहिष्कार किन गरियो ? यसको जवाफ न्यायालयले दिनैपर्छ ?’

यस विषयमा प्रश्न गर्दा जिल्ला अदालत कास्कीका सूचना अधिकारी सुरज अधिकारीले भने–‘गेटमा सबैलाई प्रवेश भन्ने कुरामा त आज दुई/दुईवटा सहकारीको बहस भएकोले धेरै भीडभाड हुने सम्भावना रहेकोले हिजो अस्तिको भन्दा केही कडाई गर्नुपर्ने अवस्था आएको हो । तर त्यसरी छिर्नै नदिएको भन्ने चाँहि होइन ।’

सोमबार न्यायाधीश चन्द्रकान्त पौडेलको ईजलास नम्बर ३ मा मित्र मिलन सहकारीको र न्यायाधीश रामचन्द्र शर्माको इजलास नं. ५ मा प्राइम सहकारीको बहस पैरवी चलिरहेको थियो । सोही क्रममा केही सहकारी पीडितहरु अदालतमा बहस पैरवी सुन्न र आफ्ना भनाईहरु राख्न इजलास भित्र उपस्थित हुन खोज्दा सुरक्षाकर्मीहरुले गेटमा नै उनिहरुलाई रोकेका थिए ।