पोखरा, ११ वैशाख । फेवातालमा आज अचानक आएको हावाहुरीका कारण डुंगा पल्टिदाँ दुर्घटनामा परेका बालिकासहित पाँचजनालाई सशस्त्र प्रहरीले सकुशल उद्धार गरेको छ । फेवाताल रेस्क्यु वाच टावरमा खटिएका सशस्त्र प्रहरीको विपद् व्यवस्थापनको टोलीले उनीहरूलाई सकुशल उद्धार गरेको थियो ।

आज दिउँसो आएको हावाहुरीका कारण डुंगा पल्टिदाँ काठमाठौं महानगरपालिका २९ का ३० वर्षीय बिक्रम मिकारानी, २६ वर्षीया आशिफा भानु, ५४ वर्षीया अनैजा दिल शाह, ८ वर्षीया रजिना खातुन र १८ महिनाकी बालिका मिरा रानीको उद्धार गरिएको सशस्त्र प्रहरी बल, कालिका गण कास्कीका प्रमुख एसपी अरुण शर्माले जानकारी दिएका छन् ।

अचानक आएको हावाहुरीको कारण डबल व्याडल बोर्डमा बोटिङ गरिरहेका उनीहरु फेवाताल नजिकै रहेको माछापालन केन्द्रको जालमा अड्किएका थिए । यसअघि चैत २५ र २९ गते पनि फेवातालमा एक्कासी आएको हावाहुरीका कारण डुंगा पल्टिएको थियो । त्यतिबेला पनि सशस्त्र प्रहरीले एक महिला र पुरूषलाई सकुशल उद्धार गरेको थियो ।