पोखरा, २८ मंसिर । नेपाल हवाई खेलकुद संस्था पोखराले आफ्नो गेष्ट आफैं उडाउन र रेट (मूल्य) समेत आफ्नै हिसाबले तोक्न पाउने निर्णय सार्वजनिक गरे लगत्तै नेपाल प्याराग्लाईडिङ पाईलट क्लबमा आवद्ध पाईलटहरु आज बिहीबारदेखि आन्दोलित भएका छन् ।

प्याराग्लाईडिङको उडान समेत रोक्दैं पाईलटहरुले अहिलेको अवस्थामा एकद्वार प्रणाली (सिण्डिकेट) कायम हुनुपर्ने माग राखेका छन् । यता, नेपाल हवाई खेलकुद संस्थाका अध्यक्ष सुनिल बहादुर भट्टराईले हिजो सम्पूर्ण प्याराग्लाईडिङ कम्पनी सञ्चालकहरुको नाममा पत्राचार गर्दै सम्पूर्ण बुकिङ सिस्टम खुल्ला गरिएको र भोलिबाट आफ्नो गेष्ट आफैं उडाउन र रेट समेत आफ्नो हिसाबले लिन अनुरोध गरेका थिए ।

सो पत्रमा नोटमा नेपाल नागरिक उडड्यन प्राधिकरणबाट लागू भएको विधिप्रविधि, पाहुनाको जानकारी र बोर्डिङ पास (रु.१००) बुझाएरमात्र उडान भर्नु हुन अनुरोध गर्दै अन्यथा कानुन अनुसार कारवाही गरिने चेतावनी समेत दिइएको छ ।

यसअघि मंसिर २७ गते नेपाल हवाई खेलकुद संस्थाका महासचिव खेमराज आचार्य र व्यवसायिक उपसमितिका संयोजक नारायण पराजुलीको कम्पनीसहित अन्य विभिन्न २१ वटा कम्पनीले मंसिर २५ गते बसेको संयुक्त भेलाको निर्णय हामीले नमान्ने र यदि सो निर्णय लागू गरेमा कानुनी उपचारमा समेत जान तयार रहेको भन्ने पत्र प्राप्त भएकोले आजैका मितिबाट सम्पूर्ण बुकिङ सिस्टम खुल्ला गरिएको पत्रमा उल्लेख छ ।

यता, नेपाल प्याराग्लाईडिङ पाईलटस् क्लब पोखराले सिण्डिकेटको विपक्षमा निर्णय भएको भन्दैं नेपाल हवाई खेलकुद संस्था पोखरालाई पत्र लेख्दैं उडान गर्न असमर्थ रहेको जानकारी गराएको छ । ‘विगतमा पनि यसरी नै खुल्ला सिस्टमले प्याराग्लाईडिङ सञ्चालन गर्दाका परिणामहरु हामीले पहिले नै देखिसकेको र यसले प्याराग्लाईडिङ बजार पूर्ण रुपमा अस्तव्यस्त रहने र सुरक्षा चुनौंती समेत रहने भएकोले अर्को निर्णय नभईन्जेलसम्मका लागि सम्पूर्ण पाईलटहरुले उडान गर्न असमर्थ रहेको’ पत्रमा उल्लेख छ ।

यस विषयमा आन्दोलतरत नेपाल प्याराग्लाईडिङ पाईलट क्लबका अध्यक्ष दीपक थापाले यो कम्पनी–कम्पनी बिचको द्वन्द्वका कारण हाम्रो भविष्य सुनिश्चित हुन नसकेको भन्दै यसरी अघि बढेमा पाईलटहरु बाँच्न नसक्ने र सुरक्षित नभएकोले छलफलका लागि भेला भएको बताए ।

अध्यक्ष थापाले भने–‘आज हामीले प्याराग्लाईडिङको उडान रोकेर वार्ताका लागि सबैलाई बोलाएका छौं । यदि आजको वार्ताबाट समस्याको टुङ्गो लागेन भने यो अनिश्चितकालका लागि उडान रोकिनेछ ।’

यता, पाईलट क्लबका निवर्तमान अध्यक्ष विमल पहारीले भने–‘यो आर्थिक संकटको बेलामा कम्पनी–कम्पनी बिचको विवादले गर्दा हामी पाईलटहरुको भविष्य पनि अलि अन्धकार जस्तो बनायो । विगत १६ महिनादेखि एकद्वार प्रणालीबाट उडान भदैं आईरहेका थियौं । अस्ति बैठक बसेर पनि ६ महिनाका लागि यसरी नै जाउँ भन्ने सल्लाह भएको थियो । तर आज साढेको जुधाई बाँच्छाको मिचाई भएको छ ।’

‘हामीले अन्तर्राष्ट्रियरस्तरमा मापदण्ड पुरा गरेको हेर्ने, ग्लाईडरदेखि सम्पूर्ण कुराको प्रत्येक वर्ष चेक जाँच हुन्छ । हाम्रो एउटा लाईनमात्र बिग्रियो भने पनि हामीले लाईन फेर्नु पर्छ ।’ निवर्तमान अध्यक्ष पहारीले भने–‘यता कम्पनीका गाडी पनि छैनन्, अफिस पनि छैन । कागजको भरमा जे पनि गर्न नपाईने ? यस्तो गर्न पाईन्छ ?’

बुकिङ सिस्टम खुल्ला गरेर आफ्नो गेष्ट आफैं उडाउने र रेट समेत आफ्नै हिसाबले तोक्दा अहिले ८ हजार रुपैयाँमा उडाईरहेकोमा ३ हजारमात्र झरेर लुछाचुँडी हुने भन्दैं यो निर्णय तत्कालै सच्याउनु पर्ने माग प्याराग्लाईडिङको उडान भर्ने पाईलटहरुले राखेका छन् ।

यस विषयमा जिज्ञासा राख्दा जिल्ला प्रशासन कार्यालय कास्कीका सहायक प्रमुख जिल्ला अधिकारी गंगाबहादुर क्षेत्रीले भने–‘कुनै पनि क्षेत्रमा सिण्डिकेट लाद्न पाईदैंन । सिण्डिकेट कानुन विपरितको कार्य हो । यस्तो गरिएको पाईएमा प्रशासनले तत्कालै कारवाही गर्न सक्दछ ।’

प्याराग्लाईडिङ उडानका लागि सिण्डिकेट लागू गर्ने वा नगर्ने विषयमा विवाद हुँदा उडान नै रोकिएको यो अवस्थामा सरोकार निकायहरु भने मौंन देखिएका छन् । राज्यको नीति र कानुन विपरित सिण्डिकेट कार्यान्वयन गराउन खुलेआम पाईलटहरुले उडान रद्द गरेर राज्यलाई नैं चूनौंती दिएका छन् । सम्बन्धित निकायहरुले यस्ता विषयहरुमा अनुगमन र कारवाही प्रक्रियालाई अघि बढाउन नसक्दा यसले पर्यटन क्षेत्रमा नकारात्मक असर परेको देखिन्छ । पोखरालाई पर्यटनको राजधानी बनाउने भन्दैं आवाज उठाई रहेको समयमा पर्यटकहरुलाई नै असर पर्ने गरी भईरहेका यस्ता गतिविधिहरुप्रति सम्बन्धित निकायले बेलैंमा सोच्नुपर्ने देखिन्छ ।

सिण्डिकेटको माग गर्दै प्याराग्लाईडिङ पाईलटहरु आन्दोलित । तस्विर ए.आई.