जाजरकोट, १८ कार्तिक । जाजरकोट आसपासलाई केन्द्र बनाएर मध्यराती गएको ६.४ म्याग्निच्युडको भुकम्पमा परी हालसम्म करिब एकसय २८ जनाको मृत्यु र एकसय ५० जना घाईते भएका छन् । भूकम्पबाट जाजरकोट र रुकुम पश्चिममा ठूलो क्षति भएको छ । जाजरकोटको नलगाड र रुकुमको आठविसकोट नगरपालिका र सानीभेरी नगरपालिकामा ठूलो क्षति भएको छ । जाजरकोटमा ९२ जनाको मृत्यु र ५५ जना घाइते र रुकुम पश्चिममा ३६ जनाको मृत्यु र ८५ जना घाइते भएका छन् ।

प्रहरी र स्थानीय जनप्रतिनिधिहरुका अनुसार नलगाड नगरपालिकाकी उपमेयर सरिता सिंह सहित जाजरकोटमा मात्र हालसम्म ४४ जनाको मृत्यु भएको पुष्टि भएको छ । भूकम्पमा परी ज्यान गुमाउनेहरुमा भेरी नगरपालिकाका ३० जना, कुशे गाउँपालिकाका ७ जना, छेडागाड नगरपालिकाका १ जना र नलगाड नगरपालिकाका ६ जना रहेका छन् ।

त्यसैगरी, जाजरकोटसँगैं रहेको रुकुम पश्चिममा पनि भूकम्पले ठुलो क्षति पुर्‍याएको छ । रुकुम पश्चिममा अहिलेसम्म ३६ जनाको मृत्यु भएको छ । जसमा ८५ जना घाइते भएका छन् । घाइते मध्ये ९ जनाको अवस्था गम्भिर रहेको र उनीहरुलाई हेलिकप्टरमार्फत् उद्धार गरी लैजाने तयारी भईरहेको त । बाँकी घाइतेहरुलाई जिल्ला अस्पताल र चौरजहारी अस्पताल लगायत अन्य विभिन्न संस्थामा उपचार भईरहेको छ ।

भूकम्पका कारण सडक अवरुद्ध हुँदा जाजरकोटमा उद्धार कार्यमा कठिनाई देखिएको छ । केही ठाउँमा सञ्चार सम्पर्क विच्छेद पनि भएको छ । भूकम्प प्रभावित क्षेत्रमा प्रधानमन्त्री पुष्पकमल दाहाल ‘प्रचण्ड’ स्वास्थ्यकर्मीको टोलिसहित प्रभावित क्षेत्रमा जान लागेको प्रेस सल्लाहकार गोविन्द आचार्यले जानकारी दिएका छन् ।