पोखरा, लामो समय देखि नेपालको अर्थ, राजनीति र समाजलाई हस्तक्षेप गर्दै आएका विदेशी संस्था र नियोगहरूले नेपालमा अफ्ना लागि तयार गरेका मानिस र संस्थाहरूलाई प्रायोजित रूपमा सबैभन्दा दुरदर्शी, असल, राष्ट्रबादि र व्यवसायिक देखाउन आफ्ना सम्पूर्ण प्रभावहरू प्रयोग गरी स्थापित गर्दै आएका छन् ।

यस्ता विदेशीले तयार गरेका मानिसहरूलाई प्रायोजित बौद्दिक बर्गबाट प्रशंसाको ओहिरो लगाइन्छ भने उनीहरूले गरे नगरेका कामलाई बढाइ–चढाइ गर्न सबै किसिमका सञ्चार माध्यमहरू प्रर्योगमा ल्याईरहन्छन् । यस्ता मानिस र विषयलाई स्थापित गर्न पैसा, भोट बैंक, जातीयता, क्षेत्रीयता, अल्पसंख्यक, द्वन्द सुरक्षा निकाय, मानबअधिकार, अन्तराष्ट्रिय युद्ध अपराध सम्मलाई आकर्षित गरेर शक्ति केन्द्रलाई कमजोर गराइन्छ । देशका सबै राजनैतिक पार्टी, निकाय र नियुक्तिमा गैरजिम्मेवार, भ्रष्ट, अपराधीक मनोबृती भएका मानिसहरूलाई नेतृत्वमा स्थापित गरी नेपालको हालको भुराजनैतिक महत्वलाई कालान्तर सम्म कब्जामा राख्ने उनीहरूको योजना हो ।

राष्ट्रियता र देशको उन्नति प्रगतिमा लाग्न प्रेरित बौद्धिक तथा असल मानिसहरू समाज र देशको मुल प्रवाहमा रहे बिदेशीको सयौँ बर्ष देखी नेपाललाई कब्जामा लिने, नेपालमा रहेका प्राकृतिक साधन स्रोत प्रशोधनमा कब्जा गर्ने र दक्षिण पुर्वी एशियाबाट बिश्वको शक्ति र अर्थतन्त्र नियन्त्रण गर्ने दौडमा रहेका चीन र इन्डियाको बिचमा रहेर सन्तुलन गर्ने योजना सहज नहुने आकलननै नेपालको राजनीति, कर्मचारीतन्त्र, सुरक्षा निकाय र समाज नियन्त्रणमा अपराधीकरणको मूलकारण हो ।

नेपालको पाठ्यपुस्तकबाट राष्ट्रियता, नैतिक शिक्षा हटाउनु, नेपाली इतिहास प्रति वितृष्णा फैलाउनु, आफ्नै इतिहासको विरूद्धमा देशवासी उचाल्नु, स्थापित मुल्यमान्यता बन्देजमा न्यायालय र प्रहरी प्रशासन लाई प्रयोग गर्नु र विदेशी मूल्य, मान्यता र कुरीतिलाई प्रश्रय दिनु नेपालको मौलिकता माथिको प्रहार र उपनिवेशीकरण गर्ने योजना अन्तर्गतका कार्यहरू हुन् ।

-सिरोज कोइराला पोखराका स्थापित युवा उद्यमी, आध्यात्मिक व्यक्तित्व समेत हुन् ।