पत्रकार महासंघको सदस्यता लिई सक्रिय राजनीति गर्ने, स्थायी शिक्षक, सरकारी कर्मचारी, गैरसरकारी संस्थाका जागिरे र व्यापार–व्यवसायमा सक्रिय व्यक्तिहरुको सदस्यता खारेजीमा परेको हो ।

पत्रकारको नाममा गैरपत्रकार सक्रिय रहँदा जिल्लाको पत्रकाररिता क्षेत्र नै बदनाम भैरहेको थियो । पत्रकार महासंघ पर्वतले ‘बास्केटफण्ड’को रुपमा स्थानीय पालिका तथा सरकारी कार्यालयबाट उठाएको ३५ लाख रुपैया महालेखा परीक्षण कार्यालयले बेरुजु देखाएको छ ।

कुश्मा (पर्वत), ११ साउन । नेपाल पत्रकार महासंघ केन्द्रीय समितिले गरेको पत्रकार शुद्धीकरणको निर्णयलाई टेकेर जाँदा पर्वतमा पत्रकार सदस्य संख्यामा करिब ४५ प्रतिशत बढीले कटौती भएको छ । पत्रकार महासंघ पर्वतका २६ सदस्यलाई गैरपत्रकार भनी पत्रकार महासंघ गण्डकी प्रदेश कमिटिले हटाएको छ ।

महासंघले पत्रकारको सदस्य लिने तर पत्रकारितामा सक्रिय नरहि बिभिन्न पेशा व्यवसायमा आवद्ध रहेका गैरपत्रकारहरुलाई सदस्यबाट हटाउने कठोर कदम चालेपछि पर्वतमा पनि गैर पत्रकारलाई सदस्यबाट हटाई कारवाही गरिएको हो ।

पत्रकार महासंघ पर्वतले पत्रकार शुद्धीकरण अभियानलाई वेवास्ता गरी हुबहु पत्रकार महासंघको प्रदेश कमिटिमा सदस्यता नविकरणका लागि सिफारिश गरेको थियो । पत्रकार महासंघ गण्डकी प्रदेश कमिटिले भने पर्वतका गैरपत्रकारहरुको सदस्यता खारेजी गरिदिएको हो । पत्रकार महासंघको सदस्यता लिई सक्रिय राजनीति गर्ने, स्थायी शिक्षक, सरकारी कर्मचारी, गैरसरकारी संस्थाका जागिरे र व्यापार–व्यवसायमा सक्रिय व्यक्तिहरुको सदस्यता खारेजीमा परेको हो ।

गैरपत्रकार विरुद्ध पत्रकारबाट नै उजुरी दर्तापछि भने कारवाही प्रक्रिया अगाडि बढेको जनाइएको छ । पत्रकार महासंघ पर्वतका अनुसार जिल्लामा क्रियाशिल पत्रकारको सदस्य संख्या ५५ जना रहेकोमा अब शुद्धीकरण अभियान पछि जम्मा २९ जना सदस्यमात्र रहेका छन् । यस वर्ष थप नयाँ सदस्य संख्या ६ गरी पत्रकार महासंघको सदस्य संख्या जम्मा ३५ रहेको छ ।

जिल्लामा पत्रकार शुद्धीकरणको लागि पत्रकार महासंघ पर्वतले सामान्य पहल गरेको थियो । पत्रकार शुद्धीकरणको सवालमा विवाद रहेपछि पत्रकार महासंघ पर्वतले विदेश गएका र मृत्यु भएका पत्रकारको नामावली हटाई अरु सबै पत्रकार सदस्यको नामावली प्रदेश कमिटिलाई सदस्यता नविकरण गर्नका लागि सिफारिश गरेको थियो ।

नेपाल पत्रकार महासंघले पत्रकारिता क्षेत्रमा व्यवसायिक सुधार ल्याउन गर्न लागिएको पत्रकार शुद्धिकरण अभियान विपरित नेपाल पत्रकार महासंघ पर्वत शाखाले हुबहु सदस्यता नविरकण गर्न सिफारिश गरिएपछि प्रदेश कमिटिले कारवाही गरेको हो । कारवाही पछि पत्रकार महासंघ पर्वतको सदस्यता लिई विभिन्न राजनीतिक दलसँग आवद्ध सक्रिय व्यक्ति, सरकारी जागिरे, शिक्षक, सक्रिय व्यवसायीहरुको साथै निस्कृय सदस्यको सदस्यता नविकरण नभई खारेजी हुने भएको छ ।

पत्रकारको नाममा गैरपत्रकार सक्रिय रहँदा जिल्लाको पत्रकाररिता क्षेत्र नै बदनाम भैरहेको थियो । पत्रकार महासंघ पर्वतले ‘बास्केटफण्ड’को रुपमा स्थानीय पालिका तथा सरकारी कार्यालयबाट उठाएको ३५ लाख रुपैया महालेखा परीक्षण कार्यालयले बेरुजु देखाएको छ । सामाजिक अभियन्ता तथा फोटोपत्रकार आरके अदिप्त गिरिले भने–‘पत्रकार शुद्धिकरणका लागि नेपाल पत्रकार महासंघको केन्द्रिय नेतृत्वले खुट्टा दरो गरी टेक्नु जरुरी छ । नत्र यो अभियान सफल हुन सकेन भने यो गलत प्रवृत्ति झनैं मौंलाएर जानेछ ।’

महासंघमा गैरपत्रकार हावी हुँदा जनसरोकारका मुद्दा ओझेल पर्ने र पत्रकारिता क्षेत्र बदनाम हुने खतरा रहेकोले पनि पत्रकार शुद्धिकरण आवश्यक रहेको उनको भनाई थियो । पत्रकार महासंघको शुद्धीकरण गरिनुपर्छ भन्ने सवालमा विवाद हुँदा लेखिएको माइन्युट समेत च्यातिनु र शाखामा ताला लगार्र्ईएको खबर बाहिरिनुले नै गैरपत्रकारको दादागिरि र अकर्मण्यता देखाएको सामाजिक अभियन्ता गिरीको भनाई छ ।

जिल्लामा प्रकाशित हुँदै आएका ११ वटा साप्ताहिक पत्रिकाहरु जसले राज्यबाट लोककल्याणकारी विज्ञापन प्रकाशन गरी वर्गिकरणमा परे वापत मासिक ४० देखि ४५ हजार रुपैयाँसम्म रकम लिंदै आएका छन् । तर बजारमा पत्रिका विक्री वितरण नै गरेको पाईदैन । जिल्लाका नागरिक समाज तथा व्यवसायीले राज्यबाट रकम लिएर पनि पत्रिका प्रकाशन नगर्नु भनेको सूचनाको हकबाट नागरिकलाई वञ्जित गर्नु हो र यो भनेको सभ्य समाजका लागि एक खाले अपराध हुने भनि पत्रकारहरुको आलोचना गरेका छन् ।