आफ्नो उम्मेदवारीलाई पुष्टि गर्दै गोदार लेख्छन् ‘हामी कहाँ छौं, पुग्नुपर्ने कहाँ हो र जहाँ पुग्नुपर्ने हो त्यहाँ पुग्ने कसरी ?’ भन्ने सवाल र उपाय हामी सबैको सर्वाधिक चासोको विषय हो र हुनुपर्छ ।

पोखरा, २९ असार । नेपाल शैक्षिक परामर्श सङ्घ (इक्यान)को उपाध्यक्षमा करिअर कोच राजन गोदारले स्वतन्त्र उम्मेदवारी दर्ता गराएका छन् ।
इक्यानलाई राजनीतिक दलको छायाँबाट मुक्त गराउन, राजनीतिकरणको अन्त्य गराउन, सङ्घले हिड्नुपर्ने बाटो र गन्तव्य पहिल्याउन गोदारले आफ्नो उम्मेदवारी दर्ता गराएको जनाएका छन् । समाज सप्तरङ्गी भए पनि व्यवसायिक संघसंस्थामा राजनीतिक रङ अपरिहार्य हुँदैन भन्ने मान्यतालाई आत्मसात गरेका गोदारले इक्यानको प्रतिष्ठा र गौरव उच्च बनाउन नेतृत्वसँग हातेमालो गरेर अगाडि बढ्ने वाचासमेत गरेका छन् ।

पोखरा र काठमाडौँमा दुई दशकभन्दा बढी शैक्षिक परामर्शदाता र करिअर कोचका रूपमा क्रियाशील राजन गोदार अलाइट ग्रुप अफ कन्सल्ट्यान्टका सञ्चालक हुन् । इक्यानको पदाधिकारीमा रहने चाहना नहुँदानहुँदै पनि बहुसङ्ख्यक इक्यानियन साथीहरूको सुझाव र जोडबलमा उम्मेदवारी दर्ता गराएको जनाएका छन् । गोदार विगतदेखिका नेतृत्वले इक्यानलाई सही मार्गदर्शन गर्न असफल भएका कारण योजनासहितका प्रतिज्ञापत्र लिएर चुनावी मैदानमा स्वतन्त्र उम्मेदवारका रूपमा उत्रिएका हुन् ।

सङ्घलाई सुशासनयुक्त, पारदर्शी, जवाफदेही र गतिशील बनाएर गन्तव्य पहिचान गर्न नेतृत्व उदार हुनुपर्छ । आवद्ध सदस्यहरूको समान सहभागिता, क्रियाशीलता र सिर्जनशीलतासँगै समान अवसरका लागि आवाज उठाउन ढिला भएकाले पेचिलो मुद्धासहित इक्यानको चुनावी मैदानमा होमिएको गोदारले सार्वजनिक गरेका छन् । आफू उपाध्यक्ष चुनिएमा स्मार्ट कार्यसम्पादनसँगै प्रविधिलाई उपयोग गर्दै थप व्यवसायिक बनाउन पहल र प्रयास गर्ने जिकिर गरेका छन् । मुलुकभरि रहेका शैक्षिक परामर्श व्यवसायीहरूलाई गोलबन्द गरी छाता सङ्गठनका रूपमा साझा चौतारी र अपनत्वको भावना महसुस गराउन मत मागेका छन् ।

राजन गोदारले आफ्नो प्रतिज्ञापत्रमा लेखेका छन्, ‘इक्यानको कार्यसमितिमा म नहुँदैमा आकाश खस्दैन, सत्य यो पनि हो अब्बल, असल र इमान्दार साथीहरू कार्यसमितिमा चुनिनुपर्छ । सम्पूर्ण सदस्यहरूको चौतर्फी हितकालागि समर्पित कार्यसमिति बनाउन सक्नु ठूलै चुनौती भए पनि उत्तरदायित्व पनि हाम्रै हो ।’

गोदारले मत दिने मात्रै होइन, लिने कामका लागि उम्मेदवारी दर्ता गरेको खुलस्त गरेका छन् । १ सय ५० भन्दाबढी इक्यानियन साथीहरूसँग सर्भेगरी सुझाव मागेर उपाध्यक्षमा उम्मेदवारी किटान गरेको जनाएका छन् ।

गोदार आफ्नो उम्मेदवारीलाई पुष्टि गर्दै लेख्छन् ‘हामी कहाँ छौं, पुग्नुपर्ने कहाँ हो र जहाँ पुग्नुपर्ने हो त्यहाँ पुग्ने कसरी ?’ भन्ने सवाल र उपाय हामी सबैको सर्वाधिक चासोको विषय हो र हुनुपर्छ । उपाध्यक्षको भूमिकामा मेरो उम्मेदवारी विशेष गरेर यसै सवालमा केन्द्रित छ । यस सवालको जवाफमा आफ्नो सम्पूर्ण ज्ञान, विवेक, अनुभव लगाएर ठोस पहलकदमी लिने प्रतिज्ञा गर्दछु ।

इक्यान नितान्त व्यावसायिक सङ्गठन हुँदाहुँदै पनि राजनीतिक दलीय शक्तिकेन्द्रहरुबाट शासित छ । स्वशासित बन्नुपर्छ भनेर नयाँ नेतृत्वलाई अनेक दलीय शक्तिकेन्द्रहरुबाट प्रभावित हुन जोगाउने रक्षक पनि चाहिएकै छ । त्यो सचेत मार्गदर्शक, रक्षक भूमिका निभाउन जुनसुकै हद पार गर्ने प्रतिज्ञा गर्दछु । र साझा अवसरको सिर्जना, समस्या र चुनौतीको समाधान, प्रतिष्ठा र पहिचानका लागि कहिल्यै सम्झौता गर्ने छैन ।

इक्यान र इक्यानियनको कामलाई राज्य स्वयम्ले चिनोस् जानोस् र बुझोस् । राज्यले अनेक अनुमति र नियमका नाममा चौतर्फी नदौडाओस् । भिसा निवेदन दिन पाइयोस् भिसाको भिख माग्न नपरोस् । गोदार आह्वान गर्छन् ‘आउनुस् एउटा साझा प्रतिज्ञा गरौं, त्यो दिन ल्याइछोड्ने प्रतिज्ञा गरौं, जुन दिन हामी सबै इक्यानियनले गर्वका साथ भन्न सकौं– ‘म इक्यानियन’, ‘म एजुकेसन कन्सल्ट्यान्ट ।’

यही असार ३० गते शनिवार हुने इक्यानको अधिवेशनमा ३ उपाध्यक्ष पदका लागि गोदारसहित १० जनाले उम्मेदवारी दर्ता गराएका छन् । शेषराज भट्टराई र विष्णुहरि पाण्डे नेतृत्वको प्यानलबाट अरू ६ जना उम्मेदवार पनि चुनावी मैदानमा होमिएका छन् ।