पोखरा, ७ पुस । पोखरा क्षेत्रीय अन्तर्राष्ट्रिय विमानस्थलमा आज बुद्ध र यती एयरलाइन्सले ‘डेमो’ (प्रदर्शन) उडान गर्दैछन् ।

अंग्रेजी नयाँ वर्षको दिन पारेर सञ्चालनमा आउन लागेको विमानस्थलमा सम्पूर्ण परिक्षण सम्पन्न गरिसकेको अवस्थामा ‘डेमो’ उडान गर्न लागिएको हो ।
पोखरा मुस्ताङचोकस्थित पुरानो विमानस्थलमा रहेका जहाजहरुले आज नयाँ विमानस्थलमा उडान गर्ने भएका हुन् ।

यती एयरलाइन्सले बिहान १० बजे र बुद्ध एयरले दिउँसो २ बजे विमानस्थलमा डेमो उडान गर्नेछन् ।

यहीँ अंग्रेजी नयाँ वर्ष (१ जनवरी २०२३) देखि यस विमानस्थलबाट साना जहाज, हेलिकप्टर र अल्ट्राफ्लाइटबाहेक सबै उडान यसै विमानस्थलबाट हुने भएको छ । यस विमानस्थलमा नेपालकै पहिलो एरोब्रिज रहेको छ । अन्तर्राष्ट्रिय उडानका यात्रु अब यसै एरोब्रिजबाट जहाज चढ्न र झर्न सक्छन् ।