पोखरा, २३ असोज । पोखरा महानगरपालिका-२८, माझठानाबाट विद्यार्थी बोकेर कालिकातर्फ आउँदै गरेको कालिका बोर्डिङ स्कुलको बस दुर्घटना हुँदा ५ जनाको मृत्यु भएको छ भने अन्य २० जना घाइते भएका छन्।

शुक्रवार बिहान भएको उक्त दुर्घटनामा परि ज्यान गुमाउने र घाइते हुनेहरूको पहिचान खुलेको छ। जिल्ला प्रहरी कार्यालय कास्कीका प्रमुख एसपी नवीन कार्कीका अनुसार दुर्घटनाग्रस्त बसमा कक्षा १० का विद्यार्थी, चालक र अन्य गरी कुल २५ जना सवार थिए। ट्युसन पढ्न जाँदै गरेका विद्यार्थी बोकेको उक्त बस कालिकास्थित ओख्लेको भिरबाट खसेर दुर्घटना भएको थियो।

मानवीय क्षति र मृतकहरूको पहिचान :
दुर्घटनामा परी ३ जनाको उपचारका क्रममा र २ जनाको पहिचान खुल्न बाँकी रहेको अवस्थामा मृत्यु भएको छ। पोखरा स्वास्थ्य विज्ञान प्रतिष्ठान (गण्डकी अस्पताल) मा उपचारका क्रममा मृत्यु हुनेहरूमा निम्न रहेका छन् :
१. ममता तिवारी (उमेर अन्दाजी १२/१३ वर्ष), बिहान ८ः३५ बजे घोषित
२. अशिम कँडेल (उमेर अन्दाजी १३/१४ वर्ष), बिहान ८ः३५ बजे घोषित
३. बाबुराम तिवारी (६५ वर्ष, पोखरा-२८), बाटामा लिफ्ट मागेर चढेका यात्री, बिहान ८ः३५ बजे घोषित
(अन्य २ जना मृतकको पहिचान खुल्ने क्रममा रहेको छ।)

दुर्घटनामा गम्भीर तथा मध्यम घाइते भएकाहरूको पोखराका दुई प्रमुख अस्पतालहरूमा उपचार भइरहेको छ ।
पोखरा स्वास्थ्य विज्ञान प्रतिष्ठान (गण्डकी अस्पताल)मा गम्भीर घाइते अवस्थामा अस्मी कँडेल (१५ वर्ष, पोखरा–२८) को उपचार भईरहेको छ । उनको टाउको र ढाडमा गम्भीर चोट लागेको छ ।

त्यसैगरी, स्नेहा गौतम, सोनिया तिवारी, अंकित पराजुली, स्मृती खत्री, स्नेहा तिवारी, आकृती बुढाथोकी, मेरिना तिवारी, सुप्रिया आचार्य, यमन मगर लगायतलाई मध्यम खालको चोट लागेको छ । साथै, बसका चालक तुल बहादुर गुरुङ (५७ वर्ष, पोखरा–१५) को ढाड र छातीमा चोट लागेको छ।

गण्डकी मेडिकल कलेजमा बोल्न सक्ने अवस्थामा रहेका मध्यम घाइतेहरूमा कक्षा १० मा अध्ययनरत सृष्टि तिवारी, शिसन थापा मगर र सौगात तिमिल्सिना रहेका छन्। उनीहरूको टाउको, ढाड, हात तथा खुट्टामा चोट लागेको छ।

घटनालगत्तै स्थानीय बासिन्दा र सुरक्षाकर्मीहरूले उद्धार कार्य तीव्र बनाएका थिए। उद्धारमा खटिएका इलाका प्रहरी कार्यालय शिशुवाका प्रहरी जवान अर्जुन शाही समेत सामान्य घाइते भएका छन्। उनको पश्चिमाञ्चल क्षेत्रीय अस्पतालमा उपचार भइरहेको छ।