बागलुङ, १९ असोज । बागलुङको निसीखोला गाउँपालिका–३ बोहोरागाउँमा सडक स्तरोन्नति गर्ने क्रममा माटोको ढिस्कोले पुरिएर दुई जना मजदुरको मृत्यु भएको छ भने एक जना गम्भीर घाइते भएका छन्।

सोमबार बिहान करिब ७ः२० बजे झिवाखोलाबाट बोहोरागाउँतर्फ जाने भित्री सडकखण्डमा लु १ क ३४४६ नम्बरको जेसिबी प्रयोग गरी सडक खन्ने काम भइरहेको थियो। सोही क्रममा अचानक माथिबाट खसेको माटोको ढिस्कोले काम गरिरहेका मजदुरहरूलाई पुरेको थियो।

घटनामा परी सल्यानका ३२ वर्षीय लालबहादुर बुढाथोकी र उदयपुर गाईघाटका ३२ वर्षीय राजु थापामगरको घटनास्थलमै मृत्यु भएको प्रहरीले जनाएको छ। दुवै जना माटोको ढिस्कोले पूर्ण रूपमा पुरिएको अवस्थामा फेला परेका थिए।

त्यसैगरी, दुर्घटनामा रोल्पाको त्रिवेणी गाउँपालिका–५ का २५ वर्षीय कृष्णबहादुर घर्ती गम्भीर घाइते भएका छन्। घटनालगत्तै उद्धार गरिएका घाइते घर्तीलाई उपचारका लागि तत्काल बुर्तिबाङ अस्पतालतर्फ पठाइएको छ। घटनाबारे थप अनुसन्धान भइरहेको र विस्तृत विवरण आउन बाँकी रहेको प्रहरीले जनाएको छ।