वीरगञ्ज (पर्सा), २६ मङ्सिर । पर्सा जिल्ला सरकारी वकिल कार्यालयले सहकारी ठगीको अभियोगमा हिरासतमा लिएर अनुसन्धान भइरहेका राष्ट्रिय स्वतन्त्र पार्टीका सभापति रवि लामिछानेलाई पोखरातर्फ पठाएको छ । लामिछानेसँगको बयान पूरा भएपछि उक्त कार्यालयले विमानबाट कास्की पठाउने क्रममा हाल उनी सिमरा विमानस्थलमा रहेका छन् ।

गितेन्द्रबाबु राई (जीवी)सँगको सांगठनिक ठगीमा संलग्न लामिछानेलाई जिल्ला सरकारी वकिल कार्यालयका प्रमुख भोलानाथ निरौलासहितको टोलीले बयान लिएको थियो । देशव्यापी रुपमा गैरकानुनी ढंगले सहकारी खोलेर जीवी राईको समूहले सर्वसाधारण जनताको अर्बौं रुपैयाँ ठगी गरेको थियो ।

जीवी राईसँगको व्यवसायिक साझेदार र सहकारीको रकम गैरकानुनी ढंगले अपचलन गरेका कारण लामिछानेमाथि अनुसन्धान भईरहेको हो । हालसम्म पनि जीवी राई लगायतको ठगहरुको ठुलो समूह फरार छ ।

पर्सा जिल्ला प्रहरी कार्यालयका प्रमुख किशोर लम्सालले अभियुक्त लामिछानेलाई सिमराबाट काठमाडौँ हुँदै कास्की पुर्याइने जानकारी दिनुभयो ।