पोखरा, २५ कात्तिक । सहकारी ठगी, संगठित अपराध र सम्पत्ति शुद्धीकरणसम्बन्धी कसुरमा अनुसन्धानका लागि राष्ट्रिय स्वतन्त्र पार्टीका सभापति, पूर्वउपप्रधान एवं गृहमन्त्री रवि लामिछानेसहितको गिरोहलाई हिरासतमा राखेर अनुसन्धान गर्न कास्की जिल्ला अदालतले थप १३ दिनको म्याद थप गरेको छ ।

न्यायाधीश नवराज दाहालको इजलासले पूर्वगृहमन्त्री लामिछानेलगायत चारै जनालाई १३ दिन हिरासतमा राखेर अनुसन्धान गर्न म्याद थप गरेको अदालतका सूचना अधिकारी सुरज अधिकारीले जानकारी दिए । उनले भने–‘लामिछानेसँगै गोर्खा मिडिया नेटवर्कका अर्का सञ्चालक पूर्वडीआईजी छविलाल जोशी, सहकारी ठगीमा पक्राउ परेका लीला पछाईं र रामबहादुर खनाललाई १३ दिन हिरासतमा राख्न म्याद थप भएको छ ।’

पूर्वगृहमन्त्री लामिछानेलाई कात्तिक २ मा रास्वपाको केन्द्रीय कार्यालयबाट पक्राउ गरेर पोखरास्थित जिल्ला प्रहरी कार्यालय कास्कीमा ल्याइएको थियो । लामिछानेलाई सुरुमा ६ दिन, त्यसपछि ७ दिन र १० दिन म्याद थप गरी अनुसन्धानपछि यसपटक थप १३ दिन म्याद थप गरिएको हो ।

सभापति लामिछानेलाई रिहाईको माग गर्दै रास्वपाका कार्यकर्ताहरुले आज पनि पोखराको आवागमनमा अवरोध गरेका छन् । कास्की भन्दा बाहिरबाट ल्याईएका केही कार्यकर्ताहरु सडकमा उतारेर रास्वपाका कार्यकर्ताहरुले अदालतमा विचाराधिन मुद्दालाई प्रभाव पार्ने गरी विरोध प्रदर्शन गरिरहेका छन् ।

केही पीडितहरुलाई अगाडि सारेर सभापति लामिछानेलाई जोगाउन रास्वपाका कार्यकर्ताहरु शुरुदेखि नै सक्रिय भएपनि यो आजसम्म यो योजना सफल हुन सकेको छैन । साथै रास्वपाका कार्यकर्ता र सभापति लामिछानेले समेत अदालत परिसरमा पीडितहरुका तर्फबाट आन्दोलनको नेतृत्व गरिरहेका संयोजक किरण श्रेष्ठलाई धम्क्याउने र बदनाम गर्ने गरी अनेकन् प्रपोगाण्डाहरु मच्चाई रहेका छन् ।

अदालतमा पीडितका संयोजक किरण श्रेष्ठसँग जम्काभेट भएका पूर्वगृहमन्त्री लामिछानेले आक्रोश व्यक्त गर्दै तथ्यहिन आक्षेप समेत लगाएका थिए । संयोजक श्रेष्ठले भने–‘हतास मानसिकताका कारण उल्टै पीडितमाथि लामिछाने खनिनु सामान्य नै लिनुपर्छ । हामीले जीवी राईको सम्पत्ति लिएको, रविलाई फसाउन आन्दोलन गरेको लगायतको झुटो आरोप लगाएका छन्, हामी यसप्रति घोर आपत्ति व्यक्त गर्दै तथ्यहिन आरोपको खण्डन गर्न चाहन्छौं, त्यो पनि सप्रमाण ।’