पोखरा । अवैध रुपमा चन्दा संकलन गरेको भन्दै प्रहरीले युनिक स्वयंसेवक नेपालका तीनजनालाई पक्राउ गरेको छ । पोखरा वडा नं. १६ विजयपुरस्थित न्यू हाईवे स्टाफ होटल एण्ड लजबाट अवैध रुपमा चन्दा संकलन गरेको अभियोगमा जिल्ला प्रहरी कार्यालय कास्कीले उनीहरुलाई पक्राउ गरेको हो ।

प्रहरीले अवैध रुपमा चन्दा संकलन गरेको अभियोगमा झापा बिर्तामोड नगरपालिका वडा नं. १ बस्ने ३४ बर्षीया एलिजा बस्नेत, झापा हल्दिबारी गाउँपालिका वडा नं १ बस्ने वर्ष ४४ बर्षीय धन बहादुर सेन्चुरी र अर्का सदस्य झापा विर्तामोड नगरपालिका वडा नं १ पश्चिम स्ट्याण्ड बस्ने ३२ बर्षीय टेक बहादुर बस्नेत लगायतलाई नगद ४ लाख ६ हजार ४ सय ६ रुपैयाँसहित बिहीबार हिजो दिउँसो पक्राउ गरेको हो ।

कोरोना संक्रमणको समयमा झापादेखि आएर युनिक स्वयंसेवक नेपाल नामको संस्थाको नामबाट यो समूहले अवैध रुपमा चन्दा संकलन गरेको भन्दै ईलाका प्रहरी कार्यालय शिशुवाबाट खटिएको प्रहरी टोलीले उनीहरुलाई पक्राउ गरेको हो । यस विषयमा प्रहरीले थप अनुसन्धान भईरहेको जानकारी दिएको छ ।