News Portal

ताजा शिर्षकहरु

चर्चित शिर्षकहरु

डन न्यूज खोज प्रमुख समाचार

पूर्वमुख्यसचिव एकनारायण अर्याल पक्राउ

काठमाडौं, ४ मंसिर । मलेसिया श्रमिक ठगी प्रकरणमा पूर्व मुख्यसचिव एकनारायण अर्याल शुक्रबार बिहान पक्राउ परेका छन्। नेपाल प्रहरीको केन्द्रीय अनुसन्धान ब्युरो (सीआईबी) ले उनलाई पक्राउ गरेको हो।

सीआईबी स्रोतका अनुसार अर्याललाई जिल्ला अदालत काठमाडौंबाट पक्राउ पुर्जी जारी भइसकेको थियो। अनुमति आएपछि उनी फरार अवस्थामा थिए। शुक्रबार बिहान सीआईबीको टोलीले उनलाई नियन्त्रणमा लिएको हो। दिउँसोसम्म औपचारिक जानकारी दिइने स्रोतले जनाएको छ।

यो पक्राउ मलेसिया जाने नेपाली कामदारमाथि भएको ठगी र त्यसबाट उठेको रकम विदेश पठाउन दिएको अनुमतिसँग जोडिएको छ। अर्याल २०७९/८० मा श्रम मन्त्रालयका सचिव थिए। त्यसबेला श्रममन्त्री शेरबहादुर कुँवर थिए। सहसचिव, सचिव हुँदै मन्त्रीसमक्ष प्रस्ताव पेस गरी बेस्टिनेट कम्पनीलाई पैसा पठाउन अनुमति दिने निर्णय भएको थियो। सोही निर्णयका आधारमा उनी अनुसन्धानको दायरामा आएका हुन्।

अर्याल २०८१ मा मुख्यसचिव बनेका थिए र गत वर्ष अवकाश पाएका थिए। यसअघि २०७६ मा मन्त्री रामेश्वर राय यादवको कार्यकालका सचिव विनोद केसी र सहसचिव उमेश ढुंगाना पनि यसै प्रकरणमा पक्राउ परिसकेका छन्। कुँवर मन्त्री हुँदा रोजगार व्यवस्थापन महाशाखाका प्रमुख राजीव पोखरेल पनि अनुसन्धानको घेरामा छन्।

उच्च प्रशासनिक पदमा बसेका व्यक्तिहरू एकपछि अर्को पक्राउ पर्दै जाँदा यो प्रकरणको गहिराइ अझ स्पष्ट हुँदै गएको छ। सीआईबीले अर्यालको पक्राउबारे औपचारिक जानकारी दिने क्रममा थप विवरण सार्वजनिक गर्ने अपेक्षा गरिएको छ।

डनन्यूज ट्रेन्डिङ