गोरखा, ६ असोज । ५५ बर्षीय माइली कामीलाई प्रहरीले श्रीमानको हत्या आरोपमा पक्राउ गरेको छ । गोरखा धार्चे गाउँपालिका वडा नं. २ करौँजा घर भई हाल गोखरा–७ पौवाखेतमा बस्दै आएका ५६ बर्षीय आइतबहादुरको श्रीमती माइलीले घाँटी थिचेर हत्या गरेकी थिईन् ।

आइतबहादुरले दिनहुँ जसो मदिरा सेवन गर्ने र बारम्बार झैझगडा र कुटपिट गर्ने हुँदा आजित भएर श्रीमानको घाँटी थिची हत्या गरेको प्रहरी अनुसन्धानबाट खुलेको छ । आरोपित माइलीले प्रहरी समक्ष घटना भएको दिन सोमबार राति पनि आइतबहादुरले चोटपटक लाग्ने गरी कुटपिट गरेपछि सहन नसकेर हत्या गरेको स्वीकार गरेकी छिन् ।

मंगलबार बिहान ५६ वर्षीय आइतबहादुर कामी सुतिरहेको अवस्थामा मृत भेटिएका थिए । प्रहरीले घटनाको अनुसन्धानको क्रममा आफ्नै श्रीमती माइलीले घाँटी थिचेर हत्या गरेको खुल्न आएको जिल्ला प्रहरी कार्यालय गोरखाका डीएसपी प्रकाश दाहालले जानकारी दिएका छन् । प्रहरीले पक्राउ परेकी माइलीलाई बुधबार जिल्ला अदालत गोरखामा कर्तव्य ज्यान शिर्षकमा मुद्दा दर्ता गरी थप अनुसन्धान अगाडि बढाएको छ ।