पोखरा । मामाको घरमा बस्दै आएकी एक बालिकाको हत्यामा संलग्न रहेको आरोपमा प्रहरीले स्याङ्जा हरिनास गाउँपालिका वडा नं. ६ चालिसेका ४५ बर्षीय रामबहादुर थापा (मोटे) भनेर चिनिने खड्कबहादुर खवासलाई १४ महिनापछि हिजो आईतबार पक्राउ गर्न सफल भएको छ ।

कास्कीको मादी गाउँपालिका वडा नं. ९ सिप्लिवेशी स्थायी घर भई स्याङ्जाको हरिनास गाउँपालिका वडा नं. १० मकै खोला मामाको घरमा बस्ने १७ बर्षीया कोपिला परियारको हत्याको आरोपमा प्रहरीले खड्कबहादुरलाई पक्राउ गरेको हो । प्रहरीले खड्गबहादुरलाई स्याङ्जाको पुतलीबजार नगरपालिका वडा नं. ४ स्थित शिवमन्दिर चोकबाट पक्राउ गरेको थियो ।

गत वर्ष कोपिलाको असार २५ गते स्याङ्जाको हरिनास गाउँपालिका वडा नं. ११ मुखिएको सेरस्थित पातिघारीमा सडीगली औंषा किरा परेको अवस्थामा शव भेटिएको थियो । स्याङ्जा प्रहरीको सहयोगमा आईतबार जिल्ला प्रहरी कार्यालय कास्कीले रामबहादुर थापा (मोटे) भनिने खड्कबहादुरलाई पक्राउ गरेको हो ।

जिल्ला प्रहरी कार्यालय कास्कीले खड्कबहादुरलाई कर्तव्य ज्यान सम्बन्धी मुद्दामा जिल्ला अदालत कास्कीबाट १० दिनको म्याद थप गरी अनुसन्धान प्रक्रिया अगाडि बढाएको छ । खड्कबहादुर र मृतक कोपिलाको शारीरिक सम्बन्ध कायम रहेको पनि अनुसन्धानका क्रममा प्रहरीले पत्ता लगाएको थियो ।