पोखरा, ४ असार । कास्कीको रुपा गाउँपालिका वडा नं. ७ धारापानीमा घाँस काट्न जाने क्रममा बाघले आक्रमण गर्दा दुई घाईते भएका छन् भने प्रतिकार क्रममा बाघको मृत्यु भएको छ । आज विहान ८ बजे घाँस काट्न जाने क्रममा वर्ष ३४ का तुलबहादुर गुरुङलाई बाघले आक्रमण गरेको थियो ।

तुलबहादुरमाथि बाघले आक्रमण गरेको देखेपछि स्थानीय वर्ष ३२ का मिलन गुरुङ लगायतले प्रतिकार गरेका थिए । प्रतिकारका क्रममा मिलन पनि घाईते भएका छन् भने घटनास्थलमा नै बाघको मृत्यु भएको गण्डकी प्रदेश प्रहरी कार्यालय पोखराले जानकारी दिएको छ । घाईते दुवैको भीरचोक स्वास्थ्य चौकीमा उपचार भईरहेको छ । घटनास्थलमा प्रहरी टोली खटिएर थप अनुसन्धान गरिरहेको छ ।