नवलपरासी । जिल्ला प्रशासन कार्यालय नवलपरासी (बर्दघाट, सुस्ता पश्चिम)ले खोला तथा नदीमा मापदण्ड विपरित उत्खनन् तथा दोहन भएका विषयमा ध्यानाकर्षण भएको भन्दै सम्बन्धित निकायहरुलाई अनुगमन गर्न आज निर्देशन दिएको छ ।

सहायक प्रमुख जिल्ला अधिकारी जोरा सिंह माझीले अनुगमन गरी प्रतिवेदन पेश गर्न जिल्ला समन्वयन समिति, सुनवल नगरपालिकाको कार्यालय र सुस्ता गाउँपालिकाको कार्यालयलाई निर्देशन दिएका हुन् ।

ठुला–ठुला मेसिन प्रयोग गरी नदी तथा खोलामा मापदण्ड विपरित उत्खनन् तथा ओसार–पसार गर्ने काम नरोकिएको विषयमा सञ्चारमाध्यममा प्रकाशित समाचारप्रति प्रशासनले ध्यानाकर्षण भएको जनाएको छ ।

ठुला उपकरण हेक्साभेटर प्रयोग गरी दिनरात पश्चिम नवलपरासीका नदी तथा खोलाहरुको अवैध उत्खनन् गर्ने काम तीव्र रुपमा भईरहेको छ । तस्करहरुले सुनवलको तुरिया खोला र पानभार खोलामा अवैधानिक रुपमा मेसिन प्रयोग गरी उत्खनन गरिरहेका छन् ।

प्रशासन कार्यालयले तुरिया खोला (माथिल्लो खण्ड), पानभार खोला (माथिल्लो खण्ड) र रायपुरा खोलाको ढुङ्गा, गिट्टी, बालुवा उत्खनन् तथा व्यवस्थापन सम्बन्धि मापदण्ड २०७७, चुरे संरक्षण क्षेत्रमा विकास निर्माण गर्दा अवलम्बन गर्नुपर्ने कार्यविधि तथा मापदण्ड २०७७ र वातावरणीय प्रभाव मूल्याकन (आईईई)को स्वीकृत मापदण्ड बमोजिम नदीजन्य पदार्थको उत्खनन्, संकलन भए नभएको सम्बन्धमा अनुगमन गरी प्रतिवेदन पठाउन निर्देशन दिएको हो ।

लकडाउनको मौका छोपी पश्चिम नवलपरासीका भुमहि खोला र तुरिया खोलामा ठुला उपकरणहरु प्रयोग गरी नदीजन्य पदार्थको उत्खनन् कार्य भईरहेको छ । मापदण्ड विपरित रायमाझी कन्सट्रक्सन (काठमाडौं), मल्टिटेक कन्ट्रक्सन एण्ड सप्लायर्स प्रा.लि. पेप्सीकोला काठमाडौंले नदी तथा खोलामा मेसिन प्रयोग गरी उत्खनन् गर्दै आईरहेका हुन् ।