स्याङ्जा । कोरोना संक्रमणको त्रासले शव जलाउन नदिदाँ आफ्नै घर अगाडि खाल्डो खनेर आमाको शव पुर्न छोरा विवश भएका छन् । छोरा बुहारीमा कोरोना संक्रमण पुष्टि भएको भोलिपल्ट बितेकी ९३ वर्षकी आमाको शव व्यवस्थापनमा गाउँलेहरुले अवरोध गरेपछि घर अगाडि खाल्डो खनेर आमाको शव पुर्न छोरा विवश भएका हुन् ।

स्याङ्जा आँधीखोला गाउँपालिका वडा नं. २ चिलाउनेवास पोखराचौरकी ती ९३ वर्षकी वृद्धा तीन वर्षदेखि दीर्घ रोगले थलिएकी थिईन् । छोराबुहारी कोरोना संक्रमित भएपछि गत मंगलबार बितेकी आमाको शवलाई छिमेकीले घाटमा जलाउने तयारी गरिरहँदा अर्को गाउँका मानिसहरुले अवरोध गरेका थिए । शव लिएर घाटमा पुगेका आफन्त र अर्का गाउँका स्थानीयवीच दिनभर तनाव र विवाद हुँदा अन्ततः आमाको शव घर अगाडि नै खाल्डो खनेर पुर्नु पर्ने अवस्था आएको हो ।

गाउँले शव जलाउनका लागि ट्याक्टरमा दाउरा हालेर घाटतर्फ जाँदै गर्दा छिमेकी वडा नं. ५ सेपत गाउँका वासिन्दा आएर कोरोना सर्नसक्ने भन्दै लाश जलाउन दिएनन् । जलाउन नदिएपछि खोला नजिकै खाल्डो खनेर पुर्न लाग्दा पनि खनेको खाल्डो पुर्न बाध्य पारेपछि उनीहरु घरै फर्किए । गाउँलेहरुको विरोधका अगाडि केही नलागेपछि गाउँपालिका स्वास्थ्य शाखा र स्वास्थ्य चौकीका कर्मचारीहरु मिलेर घर नजिकै खाल्डो खनेर शव व्यवस्थापन गरेका थिए ।

कोरोना संक्रमण फैलिएसँगै यस्तो संक्रमितहरुको शव जलाउने विषयमा ठाउँ–ठाउँमा यस्ता विवादहरु हुँदै आईरहेका छन् । कोरोना सम्बन्धि पूर्ण रुपमा जानकारी नहुँदा र यसको त्रासका कारण पनि गाउँलेहरु त्रसित भएका हुन् । यस अघि पोखरामा पनि शुरुको चरणमा कोरोना महामारी फैलिँदा लाश व्यवस्थापनका विषयमा पटक–पटक झडप भएका थिए । प्रहरीले गोली समेत चलाउनु पर्ने स्थिति आएको थियो । एकातर्फ शोकमा परेको परिवार र अर्को तर्फ आफन्तको शव व्यवस्थापनमा छिमेकीले नै देखाएको दुव्र्यवहार, कोरोना कहर झनै पिडादायी बन्दै गईरहेको छ । कोरोना संक्रमणका विषयमा आममानिसमा त्रास र भ्रम बढि देखिएको छ ।