काठमाडौँ । जिल्ला अदालत काठमाडौंले गरेको फैसला उल्ट्याउँदै जबर्जस्ती करणी (बलात्कार) मुद्दामा पनौती घर भई काठमाडौं बसोबास गर्ने पत्रकार केदार कोइरालालाई दोषी ठहर गरेको छ । उच्च अदालत पाटनले पत्रकार कोइरालालाई बलात्कार मुद्दामा दोषी ठहर गरेको हो ।

न्यायाधीशहरु अच्युत विष्ट र नवराज थपलियाको इजलासले जिल्ला अदालत काठमाडौंको यसअघिको फैसला उल्ट्याउँदै कोइरालालाई दोषी ठहर गरेका हुन् । फैसला उल्ट्याएको उच्च अदालतले कोइरालालाई सजाय तोक्नका लागि फेरि सुनुवाइ गर्ने आदेश गरेको छ ।

यसअघि काठमाडौं जिल्ला अदालतका न्यायाधीश तेजनारायण पौडेलको इजलासले आरोप पुष्टि नहुने भन्दै कोइरालालाई सफाई दिएको थियो । पत्रकार कोइरालामाथि उनकै घरमा काम गर्ने १५ वर्षीय किशोरीलाई बलात्कार गरेको आरोप लागेको थियो । जिल्ला अदालतले कोइरालालाई निर्दोष ठहर गर्दै पीडितलाई १० लाख क्षतिपूर्ति भराउने फैसला समेत गरेको थियो ।

जिल्ला अदालतको फैसलामा भनिएको थियो, ‘उक्त क्षतिपूर्तिले पीडितको जीवन निर्वाह, शारीरिक र शैक्षिक कार्यले निरन्तरताको प्रयोजनार्थ रुपैयाँ १० लाख प्रतिवादीबाट पीडितलाई जीवन निर्वाह खर्च भराइदिने ठहर्छ ।’

जिल्ला अदालतले बलात्कार मुद्दामा अनौठो फैसला गरेको भन्दै यसको सर्वत्र विरोध भएको थियो । करणीको मिति र भ्रुणको आकार नमिलेकाले बलात्कार गरेको भन्न मिलेन भन्दै अदालतले कसुर ठहर नभएका प्रतिवादीबाटै १० लाख रुपैयाँ क्षतिपूर्ति भराउनुले फैसला फौजदारी न्यायको मान्य सिद्धान्तको दृष्टिकोणले निकै आश्चर्यजनक भएको कानुनविद्हरुले विरोध जनाएका थिए ।