लमजुङ । लमजुङको मस्र्याङ्दी गाउँपालिका वडा नं. ३ थाकनस्थित हाँगोखोलामा पौडी खेल्ने क्रममा बुधबार दुईजनाको मृत्यु भएको छ । यसरी मृत्यु हुनेहरुमा सोही ठाउँ बस्ने १६ वर्षीया सिर्जना परियार र १३ वर्षीया नमूना परियार रहेका छन् ।

जिल्ला प्रहरी कार्यालय लमजुङका अनुसार घरबाट घाँस काट्न भनी गएका उनीहरु गर्मी भयो भन्दै खोलामा साँझपख पौडी खेल्न पसेका थिए । उनीहरुलाई राम्रोसँग पौडी खेल्न नआउने र खोला गहिरो भएको कारण डुबेर मृत्यु भएको प्रहरीले जनाएको छ ।

साथीहरुसँग मिलेर घाँस काट्न गएका उनीहरु मध्ये १४ वर्षीय मुस्कान परियार भने बाँच्न सफल भएकी छिन् । उनलाई डुब्न लाग्दा एकजना साथीले लठ्ठीको सहायताले उद्धार गरेको प्रहरीको भनाई छ ।

प्रहरीका अनुसार उनीहरु सिर्जना महेन्द्रदेव माविमा ८ कक्षा र नमूना विनायक आधारभूत विद्यालयको ४ कक्षाका विद्यार्थी हुन् । मृतक दुवैको शव बेँसीशहर नगरपालिका–८ स्थित जिल्ला अस्पताल लमजुङमा परीक्षणका लागि ल्याइएको छ ।