काठमाडौं । अवैध रुपमा विदेश पठाउने भन्दै लाखौं रुपैयाँ असुल्ने दुई कन्सल्टेन्सीमा वैदेशिक रोजगार विभाग काठमाडौंले छापा मारेको छ । विभागमा उजुरी परेपछि ग्लोबल इन्फो एजुकेसनल भिसा सर्भिस प्रा.लि. बानेश्वर र नेक्ट हव फर्दरिङ एजुकेसनल कन्सल्टेन्सी डिल्लीबजारमा छापा मारिएको विभागका अनुसन्धान अधिकृत मातृका सापकोटाले जानकारी दिए ।

वैदेशिक रोजगारीमा पठाउनको लागि स्वीकृति नलिएका यी दुई कन्सल्टेन्सीले अवैध रुपमा पैसा उठाउने काम गरेको उजुरी विभागमा परेको थियो । अनुसन्धान अधिकृत सापकोटाका अनुसार युरोपलगायतका विभिन्न देशमा पठाउने भनी पैसा उठाईएको उजुरीका आधारमा छापा मारेका हौं । यी दुई कन्सल्टेन्सी एजुकेसनल कन्सल्टेन्सीमात्र हुन् । यिनीहरुले वैदेशिक रोजगारीमा पठाउनका लागि स्वीकृति समेत लिएका छैनन् । यी अवैध हुन् ।

छापा मार्न आउने सुइँको पाएपछि सञ्चालक नै कार्यालय बन्द गरेर भागेपछि ग्लोबल इन्फो एजुकेसनलमा विभागले सिल गरिदिएको छ । उक्त कन्सल्टेन्सीले युरोप लगायत १०० भन्दा बढी देशमा पठाउने भन्दै लाखौं रुपैयाँ उठाउँदै आईरहेको छ ।

त्यसैगरी, विभागको टोलीले नेक्ट हव फर्दरिङमा विदेश पठाउने भन्दै रकम बुझेको भेटेको थियो । उक्त कन्सल्टेन्सीले लिथुवानिया पठाउने भन्दै ७० हजार रुपैयाँ अग्रिम बुझेको प्रमाण विभागले भेटेको हो । विभागले विभिन्न कन्सल्टेन्सीबाट तीनथान पासपोर्ट, एकथान कम्प्युटरको सीपीयु र केही कागजात बरामद गरेको छ ।