जनकपुरधाम । विदेशबाट आएको केही दिन नहुँदै श्रीमानसँगै होटलमा बसेकी महिला आज मृत फेला परेकी छिन् । छतबाट हामफालेर मृत्यु भएको भनिए पनि घटनाको प्रकृति हेर्दा शंकास्पद देखिए पछि प्रहरीले उनका श्रीमान् विश्वास श्रीपालीलाई पक्राउ गरेको छ ।

रामानन्द चोकस्थित सर्लाही होटल एण्ड गेष्ट हाउमा दुई दिनदेखि श्रीमानसँगै बसेकी ३० वर्षीय सृजना सुनार श्रीपाली मृत अवस्थामा भेटिएकी जिल्ला प्रहरी कार्यालय धनुषाका प्रवक्ता प्रहरी नायव उपरीक्षक मकेन्द्रकुमार मिश्रले जानकारी दिए ।

श्रीपालीको शव होटलको छेउमै रहेको खानेपानी संस्थानको कम्पाउण्डमा आधा शरीर पानीमा र आधा बाहिर रहेको अवस्थामा फेला परेको थियो । श्रीमानका साथमा सृजना यातायात व्यवस्था कार्यालय जनकपुरमा स्कुटरको लाइसेन्स बनाउन आएकी थिईन् ।

११ दिन अघिमात्र विदेशबाट फर्किएका विश्वासले उनकी श्रीमती सृजनाले होटलको पाँचौंतलाबाट गए राती हामफालेर आत्महत्या गरेको प्रहरी समक्ष बयान दिएका छन् । के कति कारणले सृजनाले आत्महत्या गरेकी हुन् त्यो प्रष्ट खुल्न नसकेको र घटनाको प्रकृति हेर्दा शंकास्पद देखिए पछि प्रहरीले फरक ढंगले अनुसन्धान शुरु गरेको प्रहरीले जानकारी दिएको छ ।