काठमाडौं । तस्करहरुले नयाँ–नयाँ तरिका अपनाई प्रहरीलाई नै झुक्याएर सुन तस्करी गर्दै आईरहेका छन् । पछिल्लो पटक प्रहरीले त्रिभुवन विमानस्थलबाट टर्चको ब्याट्री बक्स भित्र सुन लुकाएर ल्याएको भेटेको हो ।

तस्करहरुले एक्सरे मेसिनमा नदेखियोस् भनेर टर्चको ब्याट्री बक्स भित्रको सुनलाई सेतो बनाएर ल्याएका थिए । प्रहरीले विशेष सुराकीका आधारमा लगेज भित्रको टर्चको ब्याट्रीको बक्सबाट ३ सय ५० ग्राम सुनको बिस्कुट र ५० ग्राम परिमाणको बाला फेला पारेको महानगरीय अपराध महाशाखाले जानकारी दिएको छ ।

यसरी सुन तस्करी गरेर ल्याउने र सुन रिसिभ गर्न जाने दुवैजनालाई पक्राउ गर्न महानगरीय प्रहरी टोली सफल भएको हो । प्रहरीले सुन तस्करीमा धादिङ गजुरी गाउँपालिका घर भएका रमेश सापकोटा र सुन लिन विमानस्थल पुगेका निर्दोषकुमार थिङलाई पक्राउ गरेको हो । सापकोटाले दुवईबाट ४ सय ग्राम सुन ल्याएका थिए । प्रहरीले भन्सार पार गरेर पार्किङमा पुगेपछि अवैध सुन ल्याएको सुराक पाएको थियो ।