सुर्खेत । झुटो आरोप लगाएर आफूमाथि बलात्कार भएको भन्दै जाहेरी दिने एक महिलालाई नै अदालतले साढे ३ वर्ष कैदको सजाय सुनाएको छ । जिल्ला अदालत सुर्खेतले बलात्कारको झुटो आरोप लगाउने ती महिलालाई नै तीन वर्ष कैद सजाय तोकेको हो ।

न्यायाधीश डा.राजेन्द्रकुमार आचार्यको एकल इजलासले सोमबार आफूमाथि बलात्कार भएको भन्दै जाहेरी दिने वीरेन्द्रनगरकी ३७ वर्षीया ती महिलाविरुद्ध नैं तीन वर्ष ६ महिना कैद सजाय सुनाएको हो । ती महिलाले आफूलाई होटलमा बोलाएर बलात्कार गरिएको भन्दै गत असोज ५ गते जिल्ला प्रहरी कार्यालय सुर्खेतमा जाहेरी दिएकी थिईन् ।

ती महिलाले वीरेन्द्रगर नगरपालिकामा कार्यरत खेमराज शर्माले आफूलाई बलात्कार गरेको आरोप लगाएकी थिईन् । आफूमाथि बलात्कार भएको भन्दै जाहेरी दिएकी महिलाले नै अदालतमा बयान फेरेपछि अदालतले शर्मालाई सफाइ दिएको हो । महिलाले लगाएको आरोप र जाहेरी झुटो ठहर भएपछि ती महिलालाई नैं तीन वर्ष कैद सजाय तोकिएको अदालतका श्रेस्तेदार यामप्रसाद बास्कोटाले जानकारी दिए ।

बलात्कारको आरोप लगाउने ती महिलालाई कारागार चलान गर्न प्रहरीलाई पत्राचार गरिएको श्रेस्तेदार बास्कोटकाले बताए । पछिल्लो समय पैसा वार्गेनिङ गर्न र नियतवश बदनाम गर्ने उद्देश्यले आरोप लगाउने घटनाहरु बढिरहेको बेलामा यस घटनाले सबैलाई सचेत गराएको छ ।