News Portal

ताजा शिर्षकहरु

चर्चित शिर्षकहरु

क्राईम–न्यूज प्रमुख समाचार

दोषीलाई कारवाहीको माग गर्दै विद्यार्थी आन्दोलित

'छात्रालाई होटलको कोठामा लगेर परीक्षा लिईएको घटनामा संलग्न शिक्षकहरुलाई कारवाहीको माग'

पोखरा । छात्रालाई होटलको कोठामा लगेर परीक्षा लिईएको घटनामा संलग्न शिक्षकहरुलाई कारवाहीको माग गर्दै विद्यार्थीहरुले विरोध प्रदर्शन गरेका छन् । राष्ट्रिय माध्यमिक विद्यालय पोखरा–१, टुँडिखेलका भूतपूर्व विद्यार्थी तथा अध्ययनरत विद्यार्थीले संयुक्त रुपमा कार्यक्रमको आयोजना गर्दै विरोध जनाएका हुन् ।

गत मंसिर ११ गते अंग्रेजी तथा शिक्षा तर्फको शैक्षणिक विधि विषयको आंशिक परीक्षामा छात्रालाई विभिन्न प्रलोभनमा पारी विद्यालयभन्दा बाहिर परिक्षा लिईएको घटनामा संलग्न सबैलाई कारवाही गर्नुपर्ने माग विद्यार्थीहरुले राखेका छन् ।

होटलको कोठामा शिक्षकले मदिरा सेवन गरी छात्रालाई अनैतिक कार्य गर्न खोजेको अवस्थामा पनि सम्बन्धित निकायले कारवाहीको लागि पहल नगरेको भन्दै पहिलो चरणको आन्दोलनमा उत्रिएका हुन् । कक्षा १२ को परीक्षा दिएर नतिजाको प्रतिक्षामा रहेका विद्यार्थी सरोज पोखरेलको नेतृत्वमा भूपू विद्यार्थी शिव बुढाघरेले सहजीकरण गर्दै कार्यक्रमको आयोजना गरिएको हो ।

विद्यार्थीहरुले प्रधानाध्यापक सुर्य तिवारीलाई ध्यानाकर्षण पत्र बुझाउँदै सत्यतथ्य छानबिन नगरे चरणवद्ध आन्दोलन गर्ने चेतावनी दिएका छन् । कार्यक्रममा विद्यार्थी बुद्धि अधिकारीले यस घटनाले सम्पूर्ण विद्यालय परिवारलाई असुरक्षित अनुभूति भएको र आगामी दिनमा अभिभावकहरुलाई आफ्ना सन्तान विद्यालयमा पठाउँदा पनि एकपटक सोच्नु पर्ने दुखद अवस्था आएको बताउनुभयो ।

कार्यक्रममा भूपू विद्यार्थी केदार खनाल, विद्यार्थीहरु अनिज दुरा, रोशन आचार्य, सन्जु भाइ, सुशिल लामिछाने, सन्तोष कुँवर लगायतका विद्यार्थीहरुले ‘घटनाको सत्यतथ्य छानबिन गर’, ‘शैक्षिक माफिया होसियार’, ‘न्याय मार्न पाईदैंन’ र ‘प्रशासनको चमत्कार र विद्यार्थीमाथि अत्याचार’ लगायतका पम्प्लेट प्रदर्शन गरेका थिए ।

प्रतिक्रिया