पोखरा, १ वैशाख । पोखराको व्यस्त बजार क्षेत्रमा साँझपख धारिलो हतियार प्रहार गरी एकल महिला सिर्जना पौडेल केसीको हत्या प्रकरणमा सहयोगीको भूमिकामा रहेका थप दुईजना आफ्नै भाञ्जा र ज्वाईलाई प्रहरीले पक्राउ गरेको छ ।

सिर्जनालाई खुँडा प्रहार गर्ने सन्तोषका सहोदर भाइ पोखरा–५, जिरोकिमी बस्ने २४ वर्षीय बसन्त केसी र आफ्नै ज्वाई पर्वत फलेवास नगरपालिका वडा नं. ९ भंगारा स्थायी घर भई हाल पोखरा–१६, लामाचौर बस्ने २७ वर्षीय नवराज पौडेल क्षेत्रीलाई प्रहरीले पक्राउ गरेको हो । हत्यामा संलग्न सन्तोषलाइ आफ्नै भाइ बसन्त र भाञ्जा नवराजले पोखराबाट भाग्ने क्रममा सहयोगीको भूमिका खेलेको भन्दैं प्रहरीले थप दुबैजनालाई पक्राउ गरेको हो ।

जिल्ला प्रहरी कार्यालय कास्कीका अनुसार, गत चैत २५ गते साँझ ७ः१५ बजे पोखरा महानगरपालिका वडा नं. ८ सभागृह चोक नजिक शिवालय चोकस्थित पोखरा–बाग्लुङ सडक खण्डमा जुत्ता पसल बन्द गरेर पैदल घर फर्किँदै गरेकी ४२ वर्षीया सृजना पौडेल केसीमाथि पछाडिबाट खुडा प्रहार गरिएको थियो । टाउकोमा भएको प्रहारले टाउकाको भित्री भागसमेत बाहिर निस्कने गरी घाइते भएकी उनलाई तत्काल गण्डकी मेडिकल कलेज पु¥याइए पनि राति ८:१८ बजे चिकित्सकले मृत घोषणा गरेका थिए ।

प्रहरीको प्रारम्भिक अनुसन्धानअनुसार यो हत्या पारिवारिक अंश र सम्पत्ति विवादकै कारण योजनाबद्ध रूपमा गरिएको हो । मृतक सृजना ‘खसी कृष्णे’को नामले चिनिने मासु व्यापारी कृष्ण केसीकी दोस्रो श्रीमती थिइन् । कृष्णको पहिलो श्रीमतीको निधनपछि करिब ९ वर्षअघि विवाह भएकी सृजनाको श्रीमान् ३ वर्षअघि बितेपछि उनी ४ वर्षीया छोरीसहित एक्लै जीवन गुजार्दै थिइन् । अदालतबाट बकसपत्र सम्बन्धी मुद्दामा सृजनाकै पक्षमा फैसला भएपछि परिवारभित्र अंश र सम्पत्तिको कलह चर्किएको प्रहरीले जनाएको छ ।

घटनाको अनुसन्धानका क्रममा जिल्ला प्रहरी कार्यालय कास्की, गण्डकी प्रदेश प्रहरी कार्यालय र मातहतका वडा प्रहरी कार्यालयको संयुक्त टोलीले घटनास्थल नजिकका सीसीटीभी फुटेज, पारिवारिक पृष्ठभूमि र अन्य प्रमाण संकलन गर्दै अभियुक्तसम्म पुगेको थियो ।

पक्राउ पर्नेमा मृतकका भाञ्जा नाता पर्ने २७ वर्षीय शिशिर केसी (सन्तोष भन्ने) र उनका सहयोगी ३२ वर्षीय कुशलरत्न परियार रहेका छन् । शिशिर केसी पर्वतको कुश्मा नगरपालिका–११ शिल्मी घर भई हाल पोखरा–६ मा डेरा बस्दै आएका थिए भने कुशलरत्न परियार पोखरा–१७ रातोपैह्रो बस्ने छन् । शिशिरले खुडा प्रहार गरेको र कुशलले स्कुटरमा लगेर भगाउने मुख्य भूमिका खेलेको प्रहरीले जनाएको छ ।

प्रहरीका अनुसार, अभियुक्तहरू दिउँसैदेखि सृजनाको पसल वरिपरि घुमेर उनको पिछा गरिरहेका थिए । घटनाका बेला उनीहरूले मास्क र हेल्मेट लगाएर स्कुटरको नम्बर प्लेट छोपेका थिए । घटनामा प्रयोग भएको ग २५ प ३०४४ नम्बरको स्कुटर पोखरा–७ मुस्ताङ चोकबाट र रगत लागेको खुडा (सेतो बोराले बेरिएको) पोखरा-१७ बिरौटा तितेपानी जङ्गलबाट बरामद गरिएको छ ।

शिशिर केसीलाई रुपन्देहीको बुटवल–२ मनकामना टोलबाट र कुशलरत्न परियारलाई पोखराको लेकसाइड क्षेत्रबाट पक्राउ गरिएको थियो । शिशिर यसअघि अभद्र व्यवहार, चोरी तथा डाँका मुद्दामा संलग्न भएको र कुशल लागूऔषध मुद्दामा पटक–पटक पक्राउ पर्दै आएको प्रहरी रेकर्ड छ ।

जिल्ला प्रहरी कार्यालय कास्कीका डीएसपी हरिबहादुर बस्नेतले दुवै अभियुक्तलाई कास्की जिल्ला अदालतबाट म्याद थप गरी थप अनुसन्धान अघि बढाइएको जानकारी दिएका छन् । घटनामा संलग्न अन्य व्यक्तिहरूको पनि खोजी भइरहेको प्रहरीले जनाएको छ । यो घटनाले पोखराको स्थानीय बजार क्षेत्रमा सुरक्षा चासो बढाएको छ भने पारिवारिक सम्पत्ति विवादले उब्जाएका हिंसात्मक घटनाप्रति चिन्ता व्यक्त गरिएको छ ।