बागलुङ, १६ चैत । नक्कली नोट कारोबारको आशंकामा बागलुङका एक अधिवक्तालाई प्रहरीले पक्राउ गरेको छ । पक्राउ पर्नेमा काठेखोला गाउँपालिका–२ घर भई सदरमुकाम बागलुङमा बस्दै आएका अधिवक्ता यामबहादुर चर्माकार रहेका छन् ।

प्रहरीका अनुसार, साताअघि बागलुङ बजारका तीनवटा बैंकमा एकैसाथ एक हजार रुपैयाँका नक्कली नोट फेला परेका थिए । ती नोटमा एउटै सिरियल नम्बर (झ ७९१६९०३३) प्रयोग गरिएको थियो । बैंकका कर्मचारीले नोटको कागजको गुणस्तर कमजोर, राष्ट्रिय फूल र सुरक्षा चिह्नमा असंगति देखिएपछि तुरुन्तै प्रहरीलाई सूचना दिएका थिए । त्यसपछि प्रहरीले खोजी अभियान थालेको थियो ।

अनुसन्धानका क्रममा चर्माकारको संलग्नता देखिएको प्रहरीले जनाएको छ । उनको साथबाट पनि केही नक्कली नोट बरामद भएको थियो । प्रारम्भिक अनुसन्धानअनुसार, उनले मेडिकल पसलमा नक्कली नोट दिएर औषधि खरिद गरेको पनि पाइएको छ । बजारमा भेटिएका र उनको साथबाट बरामद भएका गरी कुल १८ थान नक्कली नोट फेला परेका छन् ।

जिल्ला प्रहरी कार्यालय बागलुङका अनुसार अनुसन्धानले अझै थप कुरा पत्ता लगाउन बाँकी रहेकोले अहिलेलाई शंकास्पद गतिविधि देखिएकाले नियन्त्रणमा लिइएको र नक्कली नोट कहाँबाट छापिएका हो, पक्राउ परेको व्यक्तिसहित अरु को-को संलग्न छन् खोजी भईरहेको छ ।

चर्माकार दुई महिनाअघि मात्र जेलबाट छुटेर बागलुङ फर्किएका थिए । सरकारी कागजात किर्ते गरेको अभियोगमा भैरहवाबाट पक्राउ परेका उनी दुई वर्षदेखि बागलुङमा थिएनन् । झन्डै डेढ दशकदेखि कानुन व्यवसाय गर्दै आएका चर्माकारमाथि यसअघि पनि दलित छात्रवृत्ति रकम हिनामिना गरेको र मुद्दाका पक्षहरूलाई आर्थिक दबाब दिएर चर्को शुल्क असुलेको आरोप लाग्ने गरेको थियो । सरकारी कागजात किर्तेको मुद्दामा भने उनले अझै सफाइ पाइसकेका छैनन् ।

आइतबार जिल्ला अदालत बागलुङले उनलाई थप अनुसन्धानका लागि सात दिनको म्याद थप गरेको छ । प्रहरीले बिहीबार नै नियन्त्रणमा लिए पनि आइतबार मात्र सार्वजनिक रूपमा जानकारी गराएको थियो ।

यो घटनाले बागलुङ बजारमा नक्कली नोटको कारोबार हुन सक्ने आशंकालाई बढाएको छ । प्रहरीले स्थानीय व्यापारी, बैंक तथा सर्वसाधारणलाई नोटको सुरक्षा चिह्न जाँचेर मात्र लेनदेन गर्न आग्रह गरेको छ । अनुसन्धान जारी रहेको प्रहरीले बताएको छ ।