काठमाडौं, १० चैत । विशेष अदालत काठमाडौँले सम्पत्ति शुद्धीकरण र भ्रष्टाचार मुद्दामा मुछिएका राजस्व अनुसन्धान विभागका पूर्वमहानिर्देशक झलकराम अधिकारीलाई २५ लाख रुपैयाँ धरौटीमा छाड्न आदेश दिएको छ ।

मंगलबार विशेष अदालतका अध्यक्ष सुदर्शनदेव भट्ट तथा सदस्यहरू हेमन्त रावल र उमेश कोइरालाको इजलासले २५ लाख धरौटीमा छाड्ने आदेश दिएको हो । अदालतमा भएको थुनछेक बहसपछि इजलासले अधिकारीलाई थुनामै राखेर पुर्पक्ष गर्नु नपर्ने तर साधारण तारिखमा पनि छाड्न नमिल्ने ठहर गरेको छ।

मिसिल संलग्न प्रमाणहरू, बैंक स्टेटमेन्ट, कल डिटेल्स र अन्य प्रतिवादीहरूको बयानलाई आधार मान्दै अदालतले उनलाई २५ लाख रुपैयाँ नगद धरौटी वा सो बराबरको बैंक जमानत लिएर तारिखमा राख्न आदेश दिएको हो ।

अख्तियार दुरुपयोग अनुसन्धान आयोगले चैत १ गते विशेष अदालतमा दायर गरेको मुद्दामा अधिकारीमाथि राजस्व अनुसन्धान विभागको महानिर्देशक हुँदा ७० लाख रुपैयाँ घुस लिएको आरोप छ । उनी महानिर्देशक बनेको एक महिनामै यो घटना भएको अख्तियारको दाबी छ ।

भ्रष्टाचारमा लिप्त भएपछि निलम्बनमा परेका सहसचिव झलकराम अधिकारी

साउन २०७९ मा एचके इन्टरप्राइजेज नामक कम्पनीविरुद्ध राजस्व चुहावटको उजुरी परेपछि कम्पनीका सञ्चालक श्रीकृष्ण श्रेष्ठले मुद्दाबाट जोगिन अधिकारीलाई ७० लाख रुपैयाँ घुस दिएको अख्तियारको अनुसन्धानले देखाएको छ । यो रकम विकास चापागाईं, देवेन्द्र केसी, रविन्द्र लामिछाने लगायतका व्यक्तिहरूको सल्लाहमा उनीहरूका खातामा राखिएको थियो ।

त्यसपछि उक्त रकमबाट भक्तपुरको दिव्यश्वरी आयोजनाभित्र ५ आना जग्गा खरिद गरिएको र देवेन्द्र केसी सञ्चालक रहेको पोखरा–६, लेकसाईडको द कुटी रिसोर्टको ऋण तिर्न पनि प्रयोग भएको अख्तियारले दाबी गरेको छ ।

झलकराम अधिकारी शेरबहादुर देउवा प्रधानमन्त्री रहेका बेला देउवा परिवारसँगको विशेष सम्पर्क सूत्रमार्फत २०७९ असार १ देखि कात्तिक १६ सम्म साढे पाँच महिनामात्र महानिर्देशक बनेका थिए । मुद्दा दायर भएसँगै उनी निलम्बनमा छन् । अख्तियारले अधिकारीमाथि भ्रष्टाचार मुद्दासँगै गैरकानुनी सम्पत्ति आर्जन गरी शुद्धीकरण गरेको आरोप पनि लगाएको छ ।