पोखरा, ९ चैत । पोखरास्थित धनुष बचत तथा ऋण सहकारी संस्थाबाट १२ करोड ५६ लाख रुपैयाँ हिनामिना गरेको अभियोगमा प्रहरीले कृष्णप्रसाद जैशी सहितका केही मुख्य व्यक्तिहरूलाई सोमबार पक्राउ गरेको छ । सहकारी पीडित भन्दैं चर्को आन्दोलन र बिरोध गर्दै आईरहेका जैशीलाई ८२ लाख रुपैयाँ ठगी गरेको आरोपमा प्रहरीले आज सोमबार पक्राउ गरेको हो ।

जिल्ला प्रहरी कार्यालय कास्कीले यस विषयमा कुनै पनि आधिकारिक सूचना नदिए पनि प्रत्यक्षदर्शीका अनुसार प्रहरीले जैशीलाई सहकारी ठगीमा घरबाट नैं पक्राउ गरी लगेको जानकारी दिएका छन् । बाँकी पक्राउ परेका अन्य व्यक्तिहरुको विषयमा भने थप परिचय खुल्न सकेको छैन ।

सहकारी रजिस्ट्रार कार्यालय गण्डकी प्रदेशले गरेको दोस्रो चरणको छानबिन प्रतिवेदनका आधारमा जिल्ला प्रहरी कार्यालय कास्कीलाई कारबाही अघि बढाउन आइतबार मात्र निर्देशन दिइएको थियो । प्रतिवेदन बुझाएको भोलिपल्टै प्रहरीले अभियुक्तहरूमाथि कारबाही थालेको हो ।

छानबिन प्रतिवेदनअनुसार सहकारीमा भएको कुल हिनामिनाको प्रमुख हिस्सा विभिन्न पदाधिकारी तथा सम्बद्ध व्यक्तिहरूबाट भएको देखिएको छ । साविक साईनो सहकारीसँग एकीकरणपूर्व नै ईन्जिनियर असिम बराल (एबिएस इन्जिनियरिङ कन्सल्टेन्सीका सञ्चालक), गमरेजजंग गुरुङ परिवार (श्रीमती काशिमाया गुरुङ र छोरी सिर्जना गुरुङ, हाल अमेरिकामा)ले ३ करोड १७ लाख रुपैयाँ घोटाला गरेको छानबिन प्रतिवेदनमा उल्लेख छ ।

सहकारीका व्यवस्थापक विराज सुवेदीले २ करोड १५ लाख रुपैयाँ हिनामिना गरेको छानबिन प्रतिवेदनमा उल्लेख छ । त्यसैगरी व्यवस्थापक तथा सचिवको दोहोरो जिम्मेवारी सम्हालेका जगत पौडेलले १ करोड २५ लाख रुपैयाँ अपचलन गरेको पुष्टि भएको छ ।

ऋण समितिमा रहेका कृष्णप्रसाद जैशीले ८३ लाख रुपैयाँ अपचलन तथा हिनामिना गरेको प्रतिवेदनले औंल्याएको छ । ई. असिम बराल र सिर्जना गुरुङले आफ्ना कर्मचारीहरू (रुपेश विजुक्छे, रेखा श्रेष्ठ लगायत) को नागरिकता दुरुपयोग गरी किर्ते दस्तावेज तयार पारेको, सहकारी दर्ता तथा बैंक खातामा तिनै किर्ते व्यक्तिको नाम प्रयोग गरी रकम निकासी गरेको छानबिनमा खुलेको छ । वित्तीय विश्लेषक निर्मल गौतमले गरेको छानबिनपछि रुपेश विजुक्छे र रेखा श्रेष्ठले बराल तथा सिर्जना गुरुङविरुद्ध जिल्ला अदालत कास्कीमा किर्ते जालसाजी मुद्दा दायर गरेका छन्, जुन हाल विचाराधीन छ ।

व्यवस्थापक विराज सुवेदी र जगत पौडेलले सहकारीमा रकम संकलन बढेसँगै कृतिम कर्जा सिर्जना गरी निकासी गरेको, अकबर श्रेष्ठ र धुलप्रसाद क्षेत्री जस्ता व्यक्तिसँग अनुचित लेनदेन गरेको तथा सञ्चालक समिति, लेखा समिति र ऋण समितिको अज्ञानताको फाइदा उठाउँदै त्रुटिपूर्ण वित्तीय विवरण बनाई गैरकानुनी लाभांश निकासी गरेको प्रतिवेदनमा उल्लेख छ ।

कृष्णप्रसाद जैशीको भूमिका विशेष चर्चामा आएको छ । बजारमा ’सहकारी पीडित’ को छवि बनाएर विभिन्न आन्दोलनमा सक्रिय जैशीले धनुष सहकारीको ऋण समितिमा बसेर व्यवस्थापक तथा सञ्चालकहरूसँग मिलेमतो गरी चर्को मिटरब्याजमा रकम लगानी गरेको र ८३ लाखभन्दा बढी ठगी गरेको खुलेको छ । ठगीबाट प्राप्त रकम उनले सूर्यदर्शन सहकारीमा जम्मा गरी आफूलाई पीडित देखाउने गरेको आरोप छ । राष्ट्रिय स्वतन्त्र पार्टी निकटस्थहरूले जैशीलाई रवि लामिछानेविरुद्ध राजनीतिक प्रतिशोधका लागि परिचालित भएको आरोप लगाउँदै आएका छन् ।

सहकारीका अध्यक्ष राजाराम सुवेदीले वेथिति देखिएपछि आफैंले रजिस्ट्रार कार्यालयमा छानबिन माग गरेका थिए । उनले मुख्य समस्या कर्मचारी र केही शेयर सदस्य (ऋण समितिका) बाट आएको बताएका थिए । पहिलो छानबिनपछि ११ करोड रुपैयाँ सोधभर्ना भएको र बाँकी रकम तिरिए सहकारीले बचतकर्ताको रकम फिर्ता गरी मुनाफामा फर्कन सक्ने दाबी गरेका थिए । तर रकम नउठेपछि दोस्रो छानबिन गरी अटेरी गर्नेहरूमाथि कारबाहीका लागि प्रहरीलाई प्रतिवेदन बुझाइएको थियो ।