पोखरा, १ चैत । बजारमा एलपी ग्यासको अभाव देखिएपछि उपभोक्ताको गुनासो बढिरहेका बेला जिल्ला प्रशासन कार्यालय कास्कीले गरेको अनुगमनमा एउटा ग्यास डिलरले सिलिन्डर लुकाएर राखेको र अवैध रूपमा ग्यास सार्ने गरेको फेला परेको छ। यस घटनामा संलग्न पोखरा–६, जरेवरस्थित भण्डारी ट्रेडर्सलाई प्रशासनले ५० हजार रुपैयाँ जरिवाना गरेको छ।

शनिबार संयुक्त अनुगमन टोलीले गरेको छड्के जाँचका क्रममा भण्डारी ट्रेडर्समा ४८ थान ठूला (१४.२ केजी) भरिएका ग्यास सिलिन्डर लुकाएर राखिएको अवस्था भेटिएको थियो। साथै, एउटा सिलिन्डरबाट अर्कोमा ग्यास सार्दै गरेको अवस्थामा तीन थान उपकरणसहित रंगेहात समातिएको सहायक प्रमुख जिल्ला अधिकारी शिव लम्सालले बताए। अनुगमन टोलीमा जिल्ला प्रशासन, प्रहरी, नेपाल आयल निगम, स्थानीय जनप्रतिनिधि तथा उपभोक्ता हित संरक्षण मञ्चका प्रतिनिधि सहभागी थिए।

उपभोक्ता संरक्षण ऐन, २०७५ अनुसार तत्काल कारबाही गर्दै ट्रेडर्सलाई ५० हजार रुपैयाँ जरिवाना तोकिएको हो। अनुगमनमा थप ३८ थान साना (९ केजी) सिलिन्डर पनि अनुचित तरिकाले व्यवस्थापन गरिएको पाइएको थियो। प्रशासनले भेटिएका सबै सिलिन्डरलाई ’पहिले आउनेलाई पहिले सेवा’का आधारमा उपभोक्तालाई बिक्री गर्न निर्देशन दिएको छ।

यसैबीच, ग्यास आपूर्ति सहज बनाउन प्रमुख जिल्ला अधिकारी रुद्रादेवी शर्माको अध्यक्षतामा बसेको सरोकारवालाको बैठकले केही महत्वपूर्ण निर्णय गरेको छ। अब ग्यास उद्योग तथा बिक्रेताले दैनिक प्राप्त र बिक्री भएको परिमाणको अभिलेख राखेर जिल्ला प्रशासन कार्यालयमा बुझाउनुपर्नेछ।

बैठकले ७५ वर्षमाथिका ज्येष्ठ नागरिक, अपाङ्गता भएका व्यक्ति र डेरामा बस्ने विद्यार्थीलाई प्राथमिकतामा न्यूनतम परिमाण ग्यास वितरण गर्न बिक्रेतालाई निर्देशन दिएको छ। साथै, ग्यासको अनावश्यक सञ्चय नगर्न, आधिकारिक प्रमाणपत्र भएका व्यवसायीले मात्र वितरण गर्न र बोतल/जर्किनमा खुला पेट्रोलियम पदार्थ बिक्री नगर्न चेतावनी दिइएको छ। एलपी ग्यासमा निर्भरता घटाउन विद्युतीय चुल्हो प्रयोग गर्न सर्वसाधारणलाई अनुरोध पनि गरिएको छ।

प्रशासनले आगामी दिनमा यस्ता कालोबजारी र कृत्रिम अभावका घटना रोक्न अनुगमनलाई थप कडाइका साथ अगाडि बढाउने जनाएको छ। यो कारबाहीले उपभोक्ता संरक्षणमा प्रशासनको प्रतिबद्धता देखाएको छ।