पोखरा, २३ कार्तिक । पोखरा–५ पस्र्याङको सामुदायिक भवन अगाडि शनिबार साँझ एमालेको वडास्तरीय जागरण भेला चलिरहेका बेला एउटा सानो नारा गुन्जियो– ‘एमालेका झोलेहरू मुर्दावाद !’ त्यही नाराले पूर्ववडाध्यक्ष तथा नेकपा एमाले गण्डकी प्रदेश सचिवालय सदस्य धनबहादुर नेपालीको टोलीलाई यति उत्तेजित बनायो कि उनीहरूले निर्दोष बटुवा र झगडा छुट्याउन आएका स्थानीयमाथि नै बर्बर आक्रमण गरे ।

कार्यक्रमस्थल नजिकैको सडकबाट नारा लगाउने युवाहरू त भागिहाले, तर माईक्रोबसबाट ओर्लिएका एक सर्वसाधारण र छुट्याउन खोज्ने नारायण पौडेल, सन्तोष पराजुली, विष्णु भट्टराईहरूमाथि एमालेको भीड नै खनियो । कार्यक्रमका प्रमुख अतिथि समेत रहेका पूर्ववडाध्यक्ष धनबहादुर नेपाली र ठेकेदार भनेर चिनिने जिवन लामाको नेतृत्वमा केही कार्यकर्ताले लखेट्दै, घाँटी समात्दै, मुक्का र लात्तिले आक्रमण गरे ।

नेकपा एमालेले शनिबार दिउँसो पोखरा–५, प्रस्र्याङ्गमा आयोजना गरेको वडास्तरीय जनजागरण कार्यक्रम ।

प्रत्यक्षदर्शीहरुले भने, “नारा लगाउने त भागे, तर जो छुट्याउन आए, तिनलाई नै एमालेको टोलीले निर्मम रूपमा कुट्यो ।” घटना स्थलको सिसिटिभी फुटेजले सबै कुरा बोल्छ । क्यामेरामा स्पष्ट देखिन्छ– धनबहादुर नेपालीले एक युवाको घाँटी कस्सेर तानेर हान्दैछन् । ठेकेदार जिवन लामा लात्तिले हानिरहेका छन् । उनीहरूसँगै अन्य कार्यकर्ताहरूको सामूहिक आक्रमण पनि कैद भएको छ । यो फुटेज हामीलाई प्राप्त भएको छ र प्रमाणका रूपमा सुरक्षित राखिएको छ ।

एमालेका नेता एवम् पूर्ववडाध्यक्ष धनबहादुर नेपालीसहित जिवन लामा र अन्य कार्यकर्ताहरुले कुटपिट गर्दै गरेको दृश्य ।

घटनाबारे बुझ्न धनबहादुर नेपालीलाई बारम्बार फोन र म्यासेज गरे पनि उनले न त फोन उठाए, न त जवाफ फर्काए । जेनजी आन्दोलनका बेला भदौ २४ मा घर छोडेर भागेका यिनै एमालेका नेता धनबहादुर अहिले सानो विरोधमा पनि गुण्डागर्दीमा उत्रिएका छन् । सामान्य नाराबाजीमा समेत सत्ताको दम्भ देखाउने यो अराजक शैलीले पोखरावासीमा त्रास र आक्रोश फैलिएको छ । स्थानीयहरूको माग छ–’सिसिटिभी प्रमाणसहित प्रहरीले तत्काल छानबिन थालोस् र दोषीमाथि कडा कारबाही होस् ।’