पोखरा, १४ कात्तिक । जिल्ला प्रहरी कार्यालय कास्कीले भदौं २४ गते कारागारबाट भागेर प्रहरी कार्यालयहरूमा तोडफोड, आगजनी तथा लुटपाट गरेको अभियोगमा थप एक जनालाई पक्राउ गरेको छ। प्रहरीले यस घटनामा संलग्न अन्य व्यक्तिहरूको पनि  खोजी जारी राखेको जनाएको छ।

वडा प्रहरी कार्यालय बैदामबाट खटिएको प्रहरी टोलीले हिजो बिहीबार पोखरा महानगरपालिका वडा नं. ७ घारीपाटन बस्ने २६ वर्षीय विवश जलारीलाई पक्राउ गरेको हो। पक्राउ परेका जलारीसँगै वडा प्रहरी कार्यालय बैदामबाट चोरी भएको क्यानन कम्पनीको ईओएस डिजिटल क्यामेरा १ थान र नम्बर प्लेट नभएको इन्जिन नम्बर JLYCJB77102 तथा चेसिस नम्बर MD2A36FY1JCB33360 भएको २०० सिसिको एनएस मोटरसाइकल १ थान बरामद गरिएको प्रहरीले जनाएको छ।

प्रहरी कार्यालयहरूमा तोडफोड, आगजनी तथा लुटपाट गर्ने पक्राउ

कास्की जिल्ला अदालतबाट अपराधिक उपद्रवसम्बन्धी मुद्दामा ६ दिनको म्याद थप गरी जलारीमाथि अनुसन्धान अघि बढाइएको छ। प्रहरीका अनुसार जलारी यसअघि कारागार कार्यालय कास्कीमा ज्यान मार्ने उद्योग मुद्दामा थुनामा थिए।

उनी भदौं २४ गते कारागारबाट भागेर वडा प्रहरी कार्यालय बैदाम पुगी लुटपाट र चोरीमा संलग्न भएको खुलेको प्रहरी प्रवक्ता तथा सूचना अधिकारी प्रहरी नायब उपरीक्षक हरीबहादुर बस्नेतले जारी गरेको प्रेस विज्ञप्तिमा उल्लेख छ।