काठमाडौँ, १२ कार्तिक । जेन-जी आन्दोलनको दोस्रो दिन प्रहरीबाट लुटिएको पेस्तोल घर लगेर पड्काएको अभियोगमा उपत्यका अपराध अनुसन्धान कार्यालयले दुई जनालाई पक्राउ गरेको छ। नुवाकोटको लिखु गाउँपालिका–६ घर भई नयाँ बजार बस्ने २३ वर्षीय समीर श्रेष्ठ र काभ्रेको पनौती नगरपालिका–१० घर भई क्षेत्रपाटी बस्ने २३ वर्षीय एलेक्स नेपाली बुधबार समातिएका हुन्।

उनीहरूको साथबाट ५४ क्यालिबरको पेस्तोल, खाली म्यागजिन र १२ राउन्ड गोली बरामद भएको छ। कार्यालयका एसपी काजीकुमार आचार्यका अनुसार, नागर्जुन नगरपालिकास्थित घरको छतमा बसेर समीरले पेस्तोल पड्काएको भिडियो फेला परेको थियो। सोही आधारमा खोजी सुरु भई समीर पक्राउ परेपछि उनकै बयानका आधारमा एलेक्स पनि समातिए। दुवैले सोधपुछमा पड्काएको स्वीकार गरेका छन्।

सुरुमा इचँगुनारायण मन्दिर क्षेत्रमा हतियार देखाएर सर्वसाधारणमा त्रास फैलाएको सूचनापछि प्रहरी खटिएको थियो। पक्राउमध्ये समीरविरुद्ध यसअघि अभद्र व्यवहारको मुद्दा चलेको पाइएको छ। दुवैविरुद्ध हातहतियार तथा खरखजनासम्बन्धी कसूरमा म्याद थप गरी विस्तृत अनुसन्धान अघि बढाइने छ।

यसैबीच, भदौ २४ मा गृहमन्त्री ओमप्रकाश अर्याल र सुधन गुरुङ समूहको दबाबले आपराधिक गतिविधिमा संलग्नहरूको खोजी रोकिए पनि अहिले प्रहरीले गति बढाएको छ। बुधबार काठमाडौंसँगै जिल्ला प्रहरी कार्यालय कास्कीको कार्यालय तोडफोड र आगजनीमा संलग्न १० जना पक्राउ परेका छन्। मंगलबार वडा कार्यालय जलाउने र हतियार लुट्नेदेखि बैंक लुट तथा प्रहरी हत्यामा संलग्नहरूसम्म समातिएका छन्।