पोखरा, ११ कार्तिक । कास्कीका विभिन्न प्रहरी कार्यालयमा गत जेठ २४ गते भएको आन्दोलनका क्रममा तोडफोड, आगजनी र हतियार लुटपाटमा संलग्न १० जनालाई प्रहरीले पक्राउ गरेको छ ।

जिल्ला प्रहरी कार्यालय कास्कीका प्रवक्ता डीएसपी हरिबहादुर बस्नेतले दिएको जानकारी अनुसार उनीहरूलाई नियन्त्रणमा लिई कास्की जिल्ला अदालतबाट अपराधिक उपद्रव मुद्दामा ६ दिनको म्याद थप गरी अनुसन्धान अघि बढाइएको छ ।

पक्राउ पर्नेमा जिल्ला प्रहरी कार्यालय कास्कीबाट हतियार लुटपाट गरी आगोमा जलाउने कार्यमा संलग्न ४ जना, वडा प्रहरी कार्यालय बगरमा हतियारको थुप्रो लगाई आगो लगाउने १ जना र प्रहरी चौकी नयाँपुलमा आगलागी गर्ने ५ जना रहेका छन् ।

पक्राउ पर्नेहरूमा धादिङको त्रिपुरासुन्दरी गाउँपालिका–४ घर भई हाल पोखरा–४ मानवअधिकार चोक बस्ने २४ वर्षीय राजेश मक्रान्ती, पोखरा–४ अधिकारी मार्ग बस्ने ५४ वर्षीय नारायण साई, पोखरा–११ फूलबारी बस्ने २२ वर्षीय अरुण विक, पोखरा–१ कसेरी बस्ने ४१ वर्षीय रुपेश मगर, पोखरा–१ मोहोरिया टोल बस्ने ४३ वर्षीय दिपु साई, अन्नपूर्ण–५ नयाँपुल बस्ने ४७ वर्षीय लङबहादुर नेपाली, सोही ठाउँ बस्ने १९ वर्षीय अर्विन विक, अन्नपूर्ण–६ हाइजुङ बस्ने २२ वर्षीय ग्रिस क्षेत्री, अन्नपूर्ण–५ नयाँपुल बस्ने ६२ वर्षीय थमबहादुर सार्की र सोही ठाउँ बस्ने ४२ वर्षीय पूर्णबहादुर नेपाली रहेका छन् । प्रहरीले उनीहरूमाथि थप अनुसन्धान भइरहेको जनाएको छ ।