काठमाडौं, २६ असोज । पूर्वसभामुख कृष्णबहादुर महरालाई नेपाल प्रहरीको केन्द्रीय अनुसन्धान ब्यूरो (सीआईबी)ले आइतबार पक्राउ गरेको छ। उनलाई विद्युतीय चुरोट (भेप)मा लुकाएर ९ किलो सुन तस्करी गरेको आरोप छ।

२०७९ पुस १० मा चिनियाँ नागरिक लि हानसोङले फ्लाई दुबईको उडानबाट काठमाडौं ल्याएका ७३० थान भेपभित्र ९ किलो सुन लुकाइएको थियो। यो सुनको मूल्य ८ करोड ५५ लाखभन्दा बढी थियो। भन्सार कर्मचारीको मिलेमतोमा सुन बेचिएको अनुसन्धानले पत्ता लागेको छ।

महरामाथि त्रिभुवन अन्तर्राष्ट्रिय विमानस्थलको भन्सारमा दबाब दिएर सुन छुटाएको र लिलाम गरी बिक्री गर्ने योजनामा संलग्न भएको आरोप छ। अनुसन्धानमा उनका छोरा निर्मल र राहुलले चिनियाँ तस्कर लि हानसोङ र दाओजिन वाङसँग पटक–पटक फोन सम्पर्क गरेको पाइएको छ। निर्मलको मोबाइलबाट लिसँग ११ पटक र राहुलसँग २८ पटक सम्पर्क भएको सीआईबीको प्रतिवेदनमा उल्लेख छ।

शंकास्पद भेप फेला परेपछि भन्सारले नियन्त्रणमा लिएको थियो। तर, तस्कर समूहले कर्मचारीसँग मिलेर सुन भएको भेप साटेर बजारको अर्को भेप राखेको पाइयो। भन्सार प्रमुख अरुण पोखरेलले अनुसन्धान गर्दा सुन तस्करीको पोल खुलेको थियो। सीआईबीले यो प्रकरणमा महरा र उनका छोराहरूको संलग्नता पुष्टि गरेको छ।

यसअघि २०८० चैतमा महरालाई अनुसन्धानका लागि बोलाएर छोराको जिम्मा लगाइएको थियो। सत्ता–शक्तिको दुरुपयोगका कारण उनीमाथि मुद्दा अघि बढेको थिएन। हाल अख्तियार दुरुपयोग अनुसन्धान आयोगले पनि यो मामिलामा अनुसन्धान गरिरहेको छ। बिहीबार महरासँग बयान लिइएको थियो।

महरा २०६२र६३ को शान्ति प्रक्रियापछि चारपटक सांसद, छ पटक मन्त्री र एकपटक सभामुख बनेका थिए। २०७६ मा संसद सचिवालयकी कर्मचारीमाथि यौन शोषणको आरोप लागेपछि उनले सभामुख पदबाट राजीनामा दिएका थिए।