स्याङ्जा, १० साउन । जिल्ला प्रहरी कार्यालय स्याङ्जाले अपराध नियन्त्रणमा फेरि एकपटक उल्लेखनीय सफलता हासिल गरेको छ। स्याङ्जाको पुतलीबजार नगरपालिका–७ ठूलाडिहीमा भएको गोली प्रहारको घटनामा संलग्न फरार अभियुक्तलाई प्रहरीले लुकाइराखिएको हतियारसहित पक्राउ गर्न सफल भएको छ ।

साउन ६ गते स्याङ्जाको पुतलीबजार नगरपालिका–७ ठूलाडिही घर भई हाल पोखरा महानगरपालिका–२६ बस्ने ४४ वर्षीय सुरेन्द्र रेग्मीमाथि गोली प्रहार भएको थियो। आफ्नै बारीमा सुन्तलाको बिरुवा रोप्न खाल्डो खन्दै गर्दा बन्दुकको ठूलो आवाजसहित उनलाई छर्रा लागेको रेग्मीले बताएका थिए। घाइते रेग्मीको बयान र उनका आफन्तको जाहेरीका आधारमा प्रहरीले अनुसन्धान तीव्र पारेको थियो।

जिल्ला प्रहरी कार्यालय स्याङ्जाबाट खटिएको विशेष टोलीले साउन ८ गते राति ८ बजे तनहुँ जिल्लामा लुकेर बसेका अभियुक्त ठूलाडिही बस्ने ठकुरी भेना भनेर चिनिने ६९ वर्षीय हुमबहादुर शाहीलाई पक्राउ गर्न सफल भयो। प्रहरीको खोजतलासका क्रममा शाहीले लुकाएर राखेको एक थान नालेभरुवा बन्दुकसमेत पुतलीबजार नगरपालिका–७ ठूलाडिहीबाट बरामद गरिएको छ।

जिल्ला प्रहरी कार्यालय स्याङ्जाका सूचना अधिकारी प्रहरी नायब उपरीक्षक प्रसन्नराज चौधरीका अनुसार अभियुक्त शाहीविरुद्ध ज्यान मार्ने उद्योग मुद्दामा स्याङ्जा जिल्ला अदालतबाट १० दिनको म्याद थप अनुमति लिई थप अनुसन्धान भइरहेको छ। घाइते सुरेन्द्र रेग्मीको हाल ललितपुरस्थित पाटन अस्पतालमा उपचार भइरहेको छ।

यो पक्राउ र हतियार बरामदले स्याङ्जा क्षेत्रमा अवैध हतियारको प्रयोग र आपराधिक गतिविधिमा संलग्न व्यक्तिहरूलाई निरुत्साहित गर्ने प्रहरीको प्रयासमा ठूलो बल पुगेको छ। प्रहरीको यो सक्रियताले स्थानीय बासिन्दामा सुरक्षाको अनुभूति बढाएको छ भने अपराध नियन्त्रणमा प्रहरीको भूमिकालाई थप प्रभावकारी बनाएको छ ।