पोखरा, ५ साउन । पोखरा–५, मालेपाटनस्थित दाङ भ्याली फ्रेस हाउसबाट १२ लाख ३० हजार रुपैयाँ चोरी भएको घटनामा प्रहरीले एकजनालाई पक्राउ गरेको छ। चोरीमा संलग्न माछापुच्छ्रे गाउँपालिका–९ का २३ वर्षीय ओम बहादुर भुजेललाई ९ लाख ९७ हजार पाँचसय रुपैयाँ नगद र दुई थान मोबाइलसहित पक्राउ गरिएको हो।

साउन २ गते राति साढे ११ बजे पोखरा–५, मालेपाटनस्थित दाङ भ्याली फ्रेस हाउसका सञ्चालक सङ्गीता भण्डारीको कोठाको दराजबाट १२ लाख ३० हजार रुपैयाँ चोरी भएको खबर प्राप्त भएको जिल्ला प्रहरी कार्यालय कास्कीका प्रवक्ता डीएसपी हरिबहादुर बस्नेतले जानकारी दिए ।

वडा प्रहरी कार्यालय बैदामको टोलीले तत्काल अनुसन्धान शुरू गर्दा भुजेललाई भोलिपल्ट साउन ३ गते राति साढे १० बजे पोखरा–६, डिकोपाटनबाट पक्राउ गरिएको हो। भुजेलमाथि चोरी तथा डाँका सम्बन्धी कसूरमा कास्की जिल्ला अदालतबाट १० दिनको म्याद थप गरी अनुसन्धान भइरहेको छ।