स्याङ्जा, २२ असार । स्याङ्जामा जबरजस्ती करणी उद्योग मुद्दामा दोषी ठहर भई फरार रहेका एक व्यक्तिलाई प्रहरीले पक्राउ गरेको छ।

पक्राउ पर्ने व्यक्ति चापाकोट नगरपालिका–९, सुन्तलीटारका ५० वर्षीय ध्रुवराज भण्डारी हुन्। उनलाई जिल्ला अदालत स्याङ्जाले तीन वर्ष ६ महिना कैद र १ लाख ५० हजार रुपैयाँ जरिवानाको सजाय तोकेको थियो।

स्याङ्जा प्रहरीका अनुसार अदालतको फैसला कार्यान्वयन गर्न चलाइएको फरार प्रतिवादी पक्राउ अभियान अन्तर्गत भण्डारीलाई बिहीबार पक्राउ गरिएको हो।

जिल्ला प्रहरी कार्यालय स्याङ्जाका निमित्त सूचना अधिकारी प्रहरी निरीक्षक प्रवेश तिवारीले “न्यायिक कारबाहीलाई पूर्णता दिँदै सुरक्षित र न्यायपूर्ण समाज निर्माण गर्ने सोचसाथ“ अभियान सञ्चालन गरिएको जानकारी दिए। पक्राउपछि भण्डारीलाई कैद भुक्तान तथा जरिवाना असुलीका लागि जिल्ला अदालत स्याङ्जामा पेश गरिएको छ।