“मैले मान्छे मारेँ, मलाई लिन आउनुस्“ भन्दै प्रहरीलाई गरे फोन

भोजपुर, २२ असार । भोजपुरको रामप्रसाद राई गाउँपालिका–२, धोद्लेखानी शनिबार राति एकै परिवारका चार सदस्यको हत्या भएपछि गाउँ शोकमा डुबेको छ।

हत्या गर्ने व्यक्ति हुन्—३० वर्षीय राजेन्द्र राई, भोजपुर नगरपालिका–२, हेलौचाका बासिन्दा। उनले आफ्नै ससुरा, सासू, पत्नी र सालोको हत्या गरेका हुन्।

मृतकमध्ये १६ वर्षीया मनिषा गिरी उनकी पत्नी थिइन्, जससँग करिब ९ महिनाअघि राजेन्द्रले प्रेम विवाह गरेका थिए। तर, अन्तरजातीय विवाह परिवार र समाजको नजरमा स्वीकार्य थिएन।

प्रहरीका अनुसार राजेन्द्र केही दिनदेखि श्रीमती लिन ससुरालीमै बसेका थिए। शनिबार राति मनिषालाई लिएर फर्किने अठोटसहित ससुराली पुगेका उनले परिवारसँगको विवाद चर्किएपछि हिंसात्मक रूप लिएको प्रारम्भिक अनुसन्धानले देखाएको छ।

कोशी प्रदेश प्रहरी प्रमुख डिआईजी ईश्वर कार्कीका अनुसार, “राजेन्द्रले दिएको बयानअनुसार ससुराली पक्षले छुरा देखाएर आक्रमण गरेपछि उनले त्यही छुरा खोसेर हत्या गरेका हुन्।”

हतियारका रूपमा प्रयोग गरिएको छुरा कसले सुरुमा प्रयोग गर्‍यो भन्नेबारे अनुसन्धान भइरहेको प्रहरीले जनाएको छ।

हतियार प्रहारबाट ज्यान गुमाउनेमा ६८ वर्षीय ससुरा बेलबहादुर गिरी, ४५ वर्षीया सासू मञ्जु गिरी, पत्नी मनिषा गिरी र ९ वर्षीय सालो सपन गिरी छन्।

हत्या गरेपछि राजेन्द्रले आफैं प्रहरी कन्ट्रोलमा फोन गरेर भने, “मैले मान्छे मारेँ, मलाई लिन आउनु।”

छुराप्रहार गरी ४ जनाको हत्या गर्ने राजेन्द्र राई

राजेन्द्रको पेटमा पनि गहिरा चोट छन्। उनी अहिले भोजपुर जिल्ला अस्पतालमा प्रहरी निगरानीमा उपचाररत छन्। अवस्था गम्भीर भएकाले थप उपचारका लागि अन्यत्र सिफारिस गर्न सकिने प्रहरीको भनाइ छ।

राजेन्द्र भोजपुर सदरमुकाममा डेरा गरेर निर्माण मजदुरी गर्थे। विवाहपछि पत्नीकै परिवारसँग सम्बन्ध बिग्रँदै गएको थियो। प्रहरीका अनुसार, अन्तरजातीय विवाहलाई लिएर पारिवारिक अस्वीकृति नै यो भीषण हत्याको मूल कारण देखिन्छ।