पोखरा, २० जेठ । विद्यार्थीहरु बोकेर शैक्षिक भ्रमणमा आएको बसमा आइतबार राति साढे ११ बजेको समयमा ढुङ्गा प्रहार गरी फरार भएका व्यक्तिहरुलाई जिल्ला प्रहरी कार्यालय कास्कीले पक्राउ गर्न सफल भएको छ ।

पोखरा–१४, चाउथेस्थित पोखराबाट काठमाडौंतर्फ जाँदैं गरेको बा१प ९१६ नम्बरको पर्यटक बसमा ढुङ्गा प्रहार गर्दा पाँचजना विद्यार्थी सामान्य घाईते भएका थिए । नेपाल कलेज अफ इन्फरमेशन टेक्नोलोजी बालकुमारी ललितपुरबाट पोखरा भ्रमणमा आएका विद्यार्थीमाथि आक्रमण भएको थियो ।

प्रहरीले घटनामा संलग्न चितवन जिल्ला राप्ती नगरपालिका वडा नं. १ घर भई हाल पोखरा–१७ घारिपाटन बस्ने ४८ वर्षीय बसचालक तिलक बहादुर थापामगर, बारा जिल्ला कोल्वी नगरपालिका वडा नं. १ घर भई हाल पोखरा–२६ बिजयपुर बस्ने ३० वर्षीय सहचालक मानप्रसाद खरेल र गोर्खा जिल्ला पालुङ्टार नगरपालिका वडा नं. २ घर भई हाल पोखरा–१४ बस्ने २८ वर्षीय राजेश मरट्टा (ग्यारेजमा कामगर्ने मजदुर)लाई पक्राउ गरेको जिप्रका कास्कीका डीएसपी हरिबहादुर बस्नेतले जानकारी दिएका छन् ।

इलाका प्रहरी कार्यालय शिशुवा र वडा प्रहरी कार्यालय रामबजारबाट संयुक्त रुपमा खटिएको टोलीले घाइते विद्यार्थीको अन्नपूर्ण अस्पताल पोखरामा सामान्य उपचार गराएको थियो ।

पक्राउ परेका तिलक, मानप्रसाद र राजेशलाई कास्की जिल्ला अदालतबाट आपराधिक उपद्रव गर्न नहुने कसूरमा दिन छ (६) म्याद थप गरी प्रहरीले अनुसन्धान प्रकृया अगाडी बढाएको छ ।