बुटवल, १४ जेठ । रूपन्देहीको बुटवलमा एक व्यक्तिले सम्बन्धविच्छेद भएको १० वर्षपछि घरमा बोलाएर पूर्वपत्नी र दुई छोरीको विभत्सपूर्ण हत्या गरेका छन् । बुटवलको होराइजनचोक स्थित मिलिजुली पथमा ३५ वर्षीय सुजन कोइरालाले आफ्नै घरमा बोलाएर पूर्वपत्नी ३४ वर्षीया दीपा बस्याल, सात वर्षीया स्नेहा र चार वर्षीया हिमानीको हत्या गरेका छन् ।

सम्बन्ध विच्छेदपछि अर्कैसँग विवाह गरेर गएकी दीपालाई उनका पूर्व श्रीमान कोइरालाले आफ्नै घरमा बोलाएर बुधबार बिहान ४ बजेतिर हत्या गरेको रुपन्देही प्रहरी प्रवक्ता डीएसपी सुरज कार्कीले जानकारी दिए । आफ्नै दाजु सुदीप कोइरालाको हत्या गरी ८/९ वर्ष जेल बसेर केही वर्षअघि संविधान दिवसको दिन आममाफी पाएर छुटेका  कोइरालाले फेरि अर्को विभत्सपूर्ण हत्या गरेका छन् ।

पाल्पामा स्वास्थ्यकर्मीका रुपमा काम गर्ने दीपा एक आफन्तको विवाहका लागि मंगलबार बुटवल आएकी थिइन्। त्यही बेला पूर्वपति सुजनले उनलाई घर बोलाएका थिए। बुटवल उपमहानगरपालिका-११, मिलीजुली पथमा रहेको कोइरालाको घरमा मंगलबार राति सुजनसँगै दीपा र उनका दुई छोरीहरू बसेका थिए।

प्रहरीका अनुसार बुधवार बिहान ४ बजेतिर सुजनले दीपा र छोरीहरूको धारिलो हतियार चक्कु र हतौडाको प्रयोग गरी हत्या गरेका थिए। कोइरालाले बिहान ६ बजेतिर आफ्नो घरको भान्सा कोठा मर्मतका लागि भन्दै एक जना व्यक्तिलाई काम गर्न घरमा बोलाएका थिए। त्यसपछि त्यहाँ हत्या भएको विषय बाहिर आएको थियो।

प्रहरीका अनुसार दीपा र सुजनबीच ०६९ सालमा विवाह भएको थियो। तर त्यही वर्ष आफ्नै माइला दाजु सुदीप कोइरालाको हत्यामा सुजन जेल परे। त्यसपछि सुजन र दीपाको सम्बन्ध चिसियो । ०७२ सालमा दीपाले सुजनसँग सम्बन्धविच्छेद गरेकी थिइन् । सम्बन्धविच्छेदपछि दीपाले पूर्वी नवलपरासीको कावासोतीका शंकर ढकालसँग विवाह गरिन्। दुई छोरीहरू ढकालपट्टिका हुन् । ढकाल भने अहिले वैदेशिक रोजगारीका लागि दुबईमा छन् ।