पोखरा, १२ वैशाख । ठगी धन्दामा संलग्न रहेको भन्दैं पोखरा–३१, बागमारा बस्ने ४५ वर्षीया मनमाया थापालाई प्रहरीले पक्राउ गरेको छ ।

पोखरा–१० स्थायी घर भई हाल बागमारा बस्दैं आईरहेकी थापालाई वैशाख १० गते जिल्ला प्रहरी कार्यालय कास्कीको टोलीले पोखरा–१० बाट पक्राउ गर्न सफल भएको थियो । थापाले गत वर्ष मंसिर २९ गते छिमेकी वृद्ध महिलासँग विहेमा जानका लागि भन्दैं ललाई फकाई गरी सुनका गरगहना लिई फरार भएकी थिईन् ।

त्यसैगरी, उनले गत वर्ष असोज २६ गते पोखरा–२, बागलुङ बसपार्कमा रहेको सुनचाँदी पसलमा गरगहना खरिद गरी हस्ताक्षर नै फरक पार्दै सात लाख ५४ हजार रुपैयाँको चेक दिई सम्पर्कविहिन भएकी थिईन् । त्यतिबेला उनले विभिन्न किसिमका गरगहना जस्तै सिक्री, बल मुन्द्रा, मिनिहार, औंठी, पिन्जडा, हेन्ड चेन र बेरुवा औंठी चेक दिदैं किनेकी थिईन् ।

मनमायाले बागमारास्थित आफ्नी छिमेकी वृद्ध महिलालाई विवाहमा जानका लागि गहना दिनुहोस्, भोलि नै गहना फिर्ता गर्छु भन्दैं लगभग चारलाख ८७ हजार रुपैयाँ पर्ने कालो माला–१ थान, बेरुवा औंठी–१ थान, सादा औंठी–१ थान लगेपछि सम्पर्कविहिन भएको भन्दैं पीडितले उजुरी दिएको जिल्ला प्रहरी कार्यालय कास्कीले जानकारी दिएको छ ।

ठगी धन्दामा संलग्न मनमायालाई कास्की जिल्ला अदालतबाट ठगी अपराधिक विश्वासघात तथा आपराधिक लाभ (एक्सटर्सन) सम्बन्धि मुद्दामा ७ दिन म्याद थप गरी जिप्रका कास्कीले अनुसन्धान प्रक्रिया अगाडि बढाएको छ ।