पोखरा, १५ भदौं । विमा रकमको लोभमा आफ्नै पसलमा आगो लगाउने सञ्चालक सुजन गहतराज र उनका साथी पवन नेपाललाई जिल्ला अदालत कास्कीले पुर्पक्षका लागि थुनामा पठाउने आदेश दिएको छ ।

न्यायाधीश हरिप्रसाद कोइरालाको ईजलासले शुक्रबार दुवैजनालाई काराचार चलान गर्ने आदेश दिएको हो । साउन १६ गते राति १ बजेर ४५ मिनेट जाँदा पोखरा–६ जरेवरस्थित डा.थानेश्वर पहारीको घरमा भाडामा लिई सञ्चालन गरिएको मुक्तिनाथ सपिङ सेन्टरमा विमाको रकम दावी गर्न नियोजित रुपमा आगजनी गरिएको प्रहरी अनुसन्धानका क्रममा खुलेको थियो ।

आगजनीमा संलग्न भएका सपिङ सेन्टर सञ्चालक स्याङ्जा जिल्ला आँधिखोला गाउँपालिका वडा नं. ६ स्थायी घर भई हाल कास्की जिल्ला पोखरा महानगरपालिका वडा नं. १७ ड्यामसाईड बस्ने ३६ वर्षीय सुजनराज गहतराज र स्याङ्जा पुतलीबजार वडा नं. ७ स्थायी घर भई हाल पोखरा–१७ बस्ने ४३ वर्षीय पवन नेपाललाई प्रहरीले आपराधिक उपद्रव मुद्दामा अनुसन्धान गरी अदालतमा मुद्दा दायर गरेको थियो ।