पोखरा, २८ साउन । धारिलो हतियार देखाई बाटोमा हिडिरहेकी महिलालाई लुटपाट गर्ने ५ जनालाई जिल्ला प्रहरी कार्यालय कास्कीले पक्राउ गरेको छ । पक्राउ परेकाहरुलाई कास्की जिल्ला अदालतबाट चोरी तथा डाँका सम्बन्धी मुद्दामा पाँच दिनको म्याद थप गरी प्रहरीले अनुसन्धान प्रकृया अगाडी बढाएको छ ।

पर्यटकीय नगरी लेकसाईडमा बाटोमा हिडिरहेकी एक २० वर्षीय महिलालाई स्कुटर र मोटरसाईकलमा आएका व्यक्तिहरुले धारिलो हतियार चक्कु घाँटीमा राखी सुनको सिक्री, नगर र ज्याकेट लुटेर फरार भएका थिए ।

साउन २७ गते राति अन्दाजी २ बजेको समयमा पोखरा–६, लेकसाईडमा बाटोमा हिडिरहेको अवस्थामा ती महिलालाको साथबाट सुनको सिक्री, १२ हजार रुपैयाँ नगद र लेदरको कालो रङको ज्याकेट पाँचजना मिलेर हतियार देखाई लुटेको कास्कीका प्रवक्ता एवम् डीएसपी बसन्त कुमार शर्माले जानकारी दिएका छन् ।

प्रहरीले लुटपाटमा संलग्न भएको आरोपमा पोखरा–१८ बस्ने ३७ वर्षीय देवन गुरुङ, सोही वडाका १९ वर्षीय आजित रुचाल भन्ने हितमान सार्की, तनहुँ व्यास नगरपालिका वडा नं. ३ घर भई हाल पोखरा वडा नं. ५ बस्ने १८ वर्षका अनिश भट्ट, पोखरा–४, गणेशटोलमा विकास सुन चाँदी पसलका सञ्चालक नारायण प्रसाद विक र एस. पि. मान्मा ज्वेलर्सका सञ्चालक प्रशान्त मान्मालाई पक्राउ गरेको थियो ।

लुटेराहरुले उक्त घटनामा ग८प ६९२४ नम्बरको डियो रातो रंगको स्कुटर र ग११प ९८२७ नम्बरको मोटरसाईकल प्रयोग गरेका थिए । अनुसन्धान क्रममा उक्त लुटिएको सुनको सिक्री खरिद गर्ने दुईजना नारायण र प्रशान्तलाई प्रहरीले पछि पक्राउ गरेको थियो ।